853 - Hagar

Það er margt sem bendir til þess að helsta átakamálið í stjórnmálum næstu vikurnar verði eignarhaldið á fyrirtækinu Högum. Sú er að minnsta kosti von sjálfstæðismanna sem virðast hafa þá köllum umfram aðrar að koma núverandi ríkisstjórn frá. Hvað þá tekur við er afar erfitt að segja en svo virðist sem forystumenn Sjálfstæðis- og Framsóknarflokks vilji fremur fiska í því grugguga vatni en vera þægir og hugsa um þjóðarhag. Sjálfstæðismenn þurfa líka að huga að því að talsverðar líkur eru á að flokkurinn klofni og hefur sú hætta farið vaxandi að undanförnu í réttu hlutfalli við aukin völd Davíðs Oddssonar.

Hvur er það sem hefur Haga?
Hann Geiri litli Bónus-son?
Úr hans magt vill Dabbi draga
Og dempa mjög hans hagavon.

(hagavon = hagnaðarvon - held ég)

Ég held samt að ríkistjórn Jóhönnu og Steingríms muni tóra enn um sinn og jafnvel koma einhverju í verk. Eflaust ekki nógu samt til að friða þá óánægðu sem sífellt fer fjölgandi. Næstu kosningar held ég að verði vorið 2011.

Orku-umræða öll mun fara mjög vaxandi á næstu mánuðum og misserum. Inn í hana blandast að sjálfsögðu náttúruverndarsjónarmið sem munu skipa sífellt hærri sess í hugum fólks. Ómar Þ. Ragnarsson og Dofri Hermannsson mundu aldrei eiga framtíð fyrir sér í Sjálfstæðisflokknum en vel er hugsanlegt að þeir plumi sig í Samfylkingunni enda eru þeir báðir þar og ætla sér áreiðanlega stóra hluti.

Svo bíða menn átekta eftir að umræður um stóra málið blossi upp einu sinni enn. Hér á ég auðvitað við ESB. Alls ekki er víst að allir aðilar fjórflokksins svonefnda komist í gegnum þau ósköp. Verstur verður klofningurinn í þessu máli líklega í Sjálfstæðisflokknum. Ef flokkurinn færist verulega til miðju eins og sumir vilja þá munu stuðningsmenn ESB-aðildar hugsa sér til hreyfings. Kvóta-auðvaldið og nýfrjálshyggjan munu þá ef til vill kljúfa sig frá öðrum í flokknum.

Lána bankar löngum frekt.
Líka stöku jóði.
En barnalán er barnalegt
og barnar sparisjóði.

Athugasemdir

[Axel Þór Kolbeinsson, 3.11.2009 kl. 08:58]

Bæði Sjálfstæðisflokkur og Samfylking eru í hættu á að klofna á næstu árum.  Ef Sjálfstæðisflokkurinn klofnar þá verður það svipað og þú telur.  Við tæki Íhaldsflokkur og frjálshyggjuflokkur.  Líklegast er að klofningurinn verði ekki það stór.  Kannski 20% félagsmanna sem færi yfir í frjálshyggjuflokk hið mesta.

Samfylking gæti aftur klofnað (eða splundrast) út frá tveimur atburðum.  Í fyrsta lagi vegna kosningar nýs leiðtoga í stað Jóhönnu, og í öðru lagi ef ESB-aðild verður felld í þjóðaratkvæði.  ESB hefur verið límið sem hefur haldið aðildarfélögum Samfylkingarinnar saman.

[Ásthildur Cesil Þórðardóttir, 3.11.2009 kl. 09:31]

Ég er að mörgu leyti sammála Axel, nema ég held að íhaldsfélagarnir séu færri en hafa hátt.  Samfylkingin er að mínu mati ósamstæður hópur flestir tækifærissinnar af stærstu gráðu og hugsa fyrst og fremst og taka ákvarðanir eftir skoðanakönnunum.   Fæstir þeirra hafa nein prinsipp önnur en að hafa völd.  Ég held að Samfylkingin hefði getað átt möguleika ef ekki hefði komið til Ingibjörg Sólrún.  Hún breytti flokknum í það sem hann er í dag.   Ef til dæmis Margrét Frímanns og hennar fólk hefði orðið ofan á.   Væri flokkurinn heilsteyptari og trúverðuglegri. 

Reyndar tel ég engan stjórnmálaflokk í dag á vetur setjandi.  Ég dauð sé eftir Frjálslyndaflokknum, sem virkilega vildi breyta ástandinu.  Sama virðist vera með Hreyfinguna, smáflokkar og ný framboð virðast ekki ná trausti fólks því miður.  Íslendingar eru svo festir á klafa fjórflokkana og alls ekki tilbúnir til að breyta til eða stökkva.  Þeir vilja bara sitja á bæjarburstinni og reyna að skiggnast út fyrir túnfótinn en þora ekki að fara þangað.

[Sæmundur Bjarnason, 3.11.2009 kl. 14:58]

Ég er sammála þér Ásthildur að tilraun Samfylkingarinnar með Ingibjörgu Sólrúnu hafi mistekist. Hún hefði samt getað heppnast við aðrar aðstæður. Axel ég veit ekki hverjir klofna og hvernig. Það er samt ekki efi í mínum huga að ESB verður mál málanna á næstu árum og mun reyna mjög á flokkana.