Bloggfærslur mánaðarins, desember 2006

Sjötta blogg

Ég er að hugsa um að blogga pínu nú, nógur er tíminn. Geri þetta í Word og peista svo í bloggið á eftir. Kannski ekki fyrr en eftir miðnætti svo einhverjir glepjist til að kíkja á þetta ef það verður dálitla stund í nýjustu bloggunum.

Kannski ég tíundi hér eitthvað um nánustu ættingja sem eru á Netinu og ég veit um. Nú, Atla og Hörpu ásamt fjölskyldu er ég búinn að minnast á. Bjarni Harðar var núna nýlega að opna kosningavef "bjarnihardar.is". Kristín Þóra og Jón eru með vefsíðu fyrir sitt fyrirtæki sem ég held að heiti Garðmenn. Elín er með heimasíðu sem ég hef nú ekki oft skoðað og svo er það náttúrlega Egill með sitt palestínublogg. (Hann er nú reyndar væntanlegur heim núna á Þorláksmessu og ég er viss um að Bjarna og Elínu léttir töluvert). Bjössi er með mikið af myndum á "123.is/blafell" en ekki mikið annað að ég held og Bjarni Sæm. er með myndasíðu á "123.is/lampshadow". Meira er það nú ekki sem ég man eftir en kannski gleymi ég einhverju. T.d. hefur Bjarni S oft verið með eitthvað á einhverjum dularfullum svæðum bæði upplýsingar um skákmót og myndir af listaverkum eftir Áslaugu. Oft hefur staðið til að setja upp myndir af verkum hennar og búa til almennilega heimasíðu undir það en ekki hefur orðið af því. Ég var svo að komast að því mér til skelfingar að ef nafnið mitt er gúglað þá kemur þetta blogg upp. Að vísu er fyrsti linkurinn í eitthvað kryptísku formati, en ekki er erfitt að ráða fram úr því.

Bjarni Harðarson segir á kosningasíðu sinni að hann sé svona skrítinn eins og hann er vegna þess að hann hafi sem 9 ára snáði verið með pabba í viku og lesið með honum íslenska fyndni. Skemmtileg kenning eins og margt sem frá Bjarna hefur komið. Á sínum tíma las ég mörg hefti af íslenskri fyndni. Ágætar bækur og ljómandi skemmtilegar, þó líklega séu þær orðnar skelfing úreltar.

Af einhverjum einkennilegum ástæðum er ein saga úr íslenskri fyndni mér minnisstæðari en margar aðrar. Hún er einhvern vegin á þessa leið: Vörubílstjóri var á leið eitthvert upp í sveit með líkkistu á pallinum. Puttalingur nokkur stoppar hann og biður um far. Farþegi var í framsætinu hjá bílstjóranum svo hann segir honum að hann verði að vera á pallinum. Svo fer að rigna og puttalingurinn skríður ofan í líkkistuna sér til skjóls. Síðan tekur bílstjórinn upp annan puttaling og vísar honum sömuleiðis á pallinn. Þegar bíllinn er síðan að fara af stað aftur rekur fyrri puttalingurinn hausinn upp úr líkkistunnni og spyr hvort hætt sé að rigna. Þeim síðari verður svo mikið um þetta að hann hendist af bílnum og út í skurð. Líklega er mér þessi saga minnisstæðari en ella vegna þess að ég man eftir mynd sem fylgdi henni í bókinni og líklega var hún eftir Halldór Pétursson. Sá sem tók saman íslenska fyndni, Gunnar frá Selalæk, var um margt merkilegur maður, sat m.a. á þingi um hríð, ef ég man rétt. Einu sinni þekkti ég dóttur hans og svo á ég einhvers staðar í dóti bók sem hann gaf út einhvern tíma um miðja síðustu öld (leynilega að líkindum) sem heitir "Apókrýfar vísur", en það er allt önnur saga.

Til skýringar á útliti bloggsins og login nafninu er rétt að taka fram að rautt er minn uppáhaldslitur (Ferrari-rautt segja sumir). Í barnæsku og allar götur síðan var ég oftast kallaður Sæmi af vinum og vandamönnum (stöku sinnum kannski Sæmi næmi eða Sæmi slæmi) og þessvegna man ég að ég varð svolítið foj inni í mér þó ég segði ekki neitt þegar Pétur á Kópaskeri úthlutaði mér mínu fyrsta netfangi fyrir margt löngu og það var saemund@ismennt.is. Sjö er eiginlega uppáhaldstalan mín (Guð fyrirgefur ekki sjö sinnum og ekki sjötíu sinnum heldur sjö sinnum sjötíu sinnum og þess vegna er 491. syndin sú krítíska og veitir ekki af að hafa eitthvað uppá að hlaupa. Einhvern tima var líka gerð kvikmynd sem heitir einfaldlega 491 - en þetta var útúrdúr.) Tómatar fara líka ansi nærri því að vera uppáhaldsfæðan mín og varðandi önnur atriði sem  snerta útlitið á blogginu þá er ég bara ekki búinn að læra á það og ekki víst að ég nenni því nokkurntíma.


Fimmta blogg

Já, það var eins og mig grunaði. Þetta blogg er ekki lesið nema fyrir einhverjar tilviljanir. Sem er mjög gott, eins og þar stendur. Kannski er það smástund fremst í svokölluðum "nýjum bloggum" hér á Moggavefnum og þess vegna slysast einhverjir til að lesa það. Ætli Salvör hafi ekki rekist á það þannig. Mér fannst alveg merkilegt hvað hún var fljót að finna það. Ég hef ekki sagt neinum frá þessu uppátæki mínu og er ekki að hugsa um að gera það, a.m.k. ekki í bráð.

Ástæðan fyrir því að slóðin á þetta blogg er saemi7.blog.is er sú að fyrst var ég búinn að tryggja mér saemi.blog.is en klúðraði því svo og þurfti að byrja aftur. Kannski hefði ég getað skrifað bloggstjóranum og fengið hann til að losa um saemi.blog.is en saemi7 er svosem ágætt.

Ég nenni ekki að vera að skrifa um fréttir og pólitík eins og flestir virðast hafa mest gaman af að gera. Mér dettur í hug að eitt geti ég skrifað um sem ekki margir gera. Það er að segja frá því hvernig þau blogg sem ég les oftast koma mér fyrir sjónir.

Eitt er það blogg sem ég læt sjaldan framhjá mér fara en það er bloggið hennar Hörpu Hreinsdóttur. (Nenni ómögulega að setja inn slóðir - á líka eftir að læra það) Bæði er það nú að hún er gift frænda mínum og svo setur hún aldrei neitt útá það þó ég sé stöku sinnum að sníkjublogga þar. Hún er líka prýðilega pennafær og hefur skemmtilegan stíl. Auðvitað er sumt sem hún skrifar óttalegt blaður og raus en bloggskrif hennar hafa að mínum dómi tvo meginkosti. Hún skrifar alveg ótrúlega reglulega og bloggin eru yfirleitt hæfilega löng. Það er að segja frekar löng. Auðvitað eru löng blogg leiðinleg ef þau eru ekki skemmtilega skrifuð. En fátt getur bjargað stuttum bloggum, þau minna bara á símskeyti.

Svo er það náttúrlega aðalgúrúinn, Salvör Gissurardóttir. Hún er nú reyndar svolítið slæm með að það verður stundum ansi langt bloggfall hjá henni og svo á hún það til að týnast. Ég var t.d. lengi að leita að henni á Metamorphosis og fann hana svo fyrir einskæra tilviljun á Moggablogginu. Hún fær hluti svolítið á heilann og bloggar kannski í nokkrar vikur næstum eingöngu um feminisma og síðan um eitthvað annað en það er alltaf gaman að lesa bloggin hennar þó stundum verði þau helst til tæknileg fyrir minn smekk.

Svo les ég náttúrlega palestínubloggið hans Egils og eitthvað var hann nú með á Netinu áður en sú ferð var farin en það var dálítið stopult og tilviljanakennt hjá honum. Mánabloggið les ég líka alltaf öðru hvoru og það er oft gaman að fylgjast með hvernig samskiptum þeirrar fjölskyldu er háttað í Netheimum. Ekkert blogg hef ég þó fundið ennþá eftir Vífil. Það fréttist lítið af honum í bloggheimum nema það sem mamma hans lætur flakka. Atli er t.d. alltaf með sitt gáfumannablogg eða greinaskrif og alveg umdeilanlegt hvort hægt er að kalla það blogg.

Það eru svosem mörg fleiri blogg sem ég les reglulega en ég ætla að láta það bíða betri tíma að fjölyrða um þau. Læt nægja að segja að blogglistinn í "favorities" hjá mér er óheyrilega langur og  stundum er ég í því að flytja blogg þar ofar en  samt kemst ég aldrei yfir hann allan.

 


Fjórða blogg

 

Þá er komið að fjórða bloggi.

 

Ótæpt nú ýmsir blogga

álnarlangt þvers og kruss.

Meðvitað styrktir af Mogga.

Margir því gera fuss.

 

Mér finnst ekki neitt pólitískt við að blogga og sé ekkert athugavert við að Mogginn stuðli að því að sem flestir geri það. Hinsvegar má gera ráð fyrir að öll þau frétta og dægurmálablogg sem nú tröllríða öllu í bloggheimum verði til þess að aðrir miðlar og einkum þó prentmiðlar fari halloka. Það er svo kannski bara eðlilegt, þó sumir mundu kannski kalla það fjörbrot, að óvenjuleg gróska virðist vera að hlaupa í prentmiðla í landinu einmitt núna.

Mér finnst merkilegt að hægt  skuli vera að fá fólk  til að borga fyrir það sem hægt er að fá  nóg af ókeypis á Netinu. Auðvitað eiga sumir meira af peningum en þeir hafa gott af og það að kaupa sér það sem maður vill lesa er auðvitað val. Það sem merkilegast er að frétta úr sölumiðlum ratar þó alltaf fyrr eða síðar á Netið, en auðvitað stundum svolítið afbakað.

Það sem mér finnst merkilegast að ræða um á bloggi er  bloggið sjálft.  Ég er sannfærður um að það er eitthvað það merkilegasta sem Netið hefur skilað. Athugasemdir eða komment  við það sem aðrir hafa skrifað tryggja þegar vel tekst til áhugaverðar samræður. Auðvitað er mjög margt af því sem bloggað er um nauðaómerkilegt eða þá dægurþras sem alls ekki allir hafa áhuga á, en það má þá leiða hjá sér. Flestir hljóta að finna sér þar eitthvað við hæfi ef þeir hafa næga þolinmæði til að leita.

Varðandi fríblöðin sem mjög er í tísku að fjölyrða  um núna vil ég bara taka fram að Fréttablaðið berst mjög oft til mín en Blaðið aldrei. Meðan Blaðinu var dreift með póstinum kom það þónokkuð oft til okkar á þeim  hjara veraldar sem heitir Kópavogur. Eftir að því var hætt barst það af og til framanaf en núna síðustu mánuðina alls ekki. Morgunblaðið hættum við að kaupa fyrir nokkrum árum.

sb


Þriðja blogg

 

Ekki var ég fyrr búinn að setja "annað blogg" inn en ég sá ýmsa galla á þeirri færslu. Fonturinn var of lítill, greinaskil undarleg og svo var ég svo viss um að enginn mundi lesa þetta að ég gáði ekki einu sinni fyrr en  á eftir hvort hugsanlega hefði verið sett inn athugasemd.

Þá sá ég að Salvör Gissurardóttir hafði einmitt gert það og það er alveg rétt hjá henni að ég er sá Sæmundur sem hún nefnir. Það væri nú svosem gaman að ræða um Netútgáfuna hér og mál henni tengd en líklega fáir sem hafa áhuga á  því.

Ekki veit ég hvernig Salvör hefur fundið bloggið mitt og teljarinn segir að 17 hafi skoðað það en því trúi ég nú varlega.

Rétt áðan (já klukkan að verða fjögur að nóttu) var komið með stærðar jólapakka til mín frá fyrirtækinu sem ég vinn hjá og svo hef ég heyrt að ég fái e.t.v. líka pakka frá MS.

Mér finnst sjálfum mest gaman að lesa blogg sem eru ekki alltof löng og ekki heldur of stutt svo ég held að ég láti þetta nægja að sinni þó stutt sé. Blogga eflaust meira og lengra ef einhverjir lesa þetta og svo ég tali nú ekki um ef athugasemdir verða settar inn.

 

 


Annað blogg

Nokkrir dagar eru síðan ég bloggaði síðast og að sjálfsögðu hafa ekki margir litið hér inn. Meðan engir lesa þetta þá er ástæðulaust að skrifa mikið. Á ýmsu hef ég þó skoðanir og sjálfum finnst mér þær oft merkilegar. Áslaug fékk bréf í gær frá sýslumanninum á Selfossi um að hún ætti smáspildu í Ásgautsstaðalandi við Stokkseyri. Pabbi hennar hafði eihvern tíma fest kaup á einum níunda hluta úr jörðinni og það hefði átt að skiptast á milli þeirra allra systkinanna. Eitthvað fer samt á milli mála hvort bræður hennar hafi e.t.v. verið búnir að láta þennan part fyrir alllöngu á lítið eða ekki neitt. Kemur í ljós. 

Þessa dagana erum við aldrei slíku vant með 2 bíla og notum þá til skiptis. Keyptum um daginn Subaru Outback og látum sennilega áður en langt um líður Vovoinn. Ég er búinn að kaupa það sem ég þarf fyrir jólin og byrjaður á vaktasyrpu sem stendur allt fram á Þorláksmessu. Læt þetta duga í bili. 

sb  


Fyrsta blogg

 

Þetta er nú bara svona til að prófa.

Mér hefur sýnst að Morgunblaðið sé að leggja  mikla áherslu á það núna undanfarið að fá  sem flesta bloggara. Ég hef nú afar líkið gert af því að blogga,  en þó prófaði ég það eitthvað smávegis fyrir  allmörgum árum þegar þetta var  alveg nýr siður. Þá fór ég  eftir því sem Salvör Gissurardóttir sagði mönnum til á sínu bloggi og ég man að ég skrifaði eitthvað smávegis á lén sem hét og heitir e.t.v. ennþá "pitas.com", en það stóð ekki lengi og datt mjög flótlega uppfyrir eins og þetta mun líklega gera líka. Ég er aftur á móti nokkuð duglegur að lesa annarra manna blogg sem er auðvitað allt annar handleggur.

 

Nú eru hinsvegar allir farnir að blogga og ég geri alveg ráð fyrir að þetta blogg týnist í öllum fjöldanum og þetta á svo sem alls ekki að verða neitt vinsældablog og mér er alveg sama  hvort nokkrir lesa þetta. Kannski gera það fáeinir ef þetta gengur sæmilega og ég segi frá því. Sjáum til.

sb


Fyrsta bloggfærsla

Þessi færsla er búin til af kerfinu þegar notandi er stofnaður. Henni má eyða eða breyta að vild.

Innskráning

Ath. Vinsamlegast kveikið á Javascript til að hefja innskráningu.

Hafðu samband