1263 - Stíll

Mér finnst ég hafa ljósan og einfaldan stíl. Veit samt ekkert hvað aðrir álíta um stíl minn eða stílleysi. Allir skrifa einhvern vegin. Líklegast er að engir tveir skrifi eins um sama atburðinn svo dæmi sé tekið. Það er stíll. Knappur bloggstíll er auðlærður. Mér finnst yfirlestur (helst hálfhátt) vera bestur til að ná þeim stílblæ á bloggið sem óskað er. Orðin sem slík hafa engin áhrif. Nausynlegt er samt að hafa á valdi sínu allmörg orð yfir sama eða svipað efni (nú, eða búa þau til) til að forðast endurtekningar.

Hástigsorð og hvers kyns bölv og ragn eru óvinir stíls. Blogg eru mjög mislæsileg. Kannski er það stíllinn sem ræður. Efnið ræður auðvitað miklu líka. Fæstir lesa mikið um það sem þeir hafa engan áhuga á. Ég reyni að hafa efnisval mitt sem fjölbreyttast. Allt getur orðið leiðigjarnt í of miklu magni. Auðvitað er margt annað en það sem ég hef minnst á sem úrslitum ræður um stíl og stílblæ. Sumir halda að engu máli skipti hvernig skrifað er um hlutina. Bara ef sannleikurinn fær að njóta sín. Slíkt er mikill misskilningur.

Menn mega ekki halda að Steingrímur J. Sigfússon sé einhver hvítþveginn engill. Hann er bara gamaldags stjórnmálamaður sem svíkur og prettar þegar það kemur honum vel. Man vel eftir því máli sem hér er sagt frá. Þessa frásögn fann ég einhversstaðar á bloggi minnir mig. Man að Steingrímur hummaði þetta mál allt saman fram af sér og gott ef bændagreyin fóru ekki á hausinn útaf þessu.

Á síðustu dögum sínum í landbúnaðarráðuneytinu vorið 1991 keypti Steingrímur í fullkomnu heimildarleysi mannvirki (níu refahús) af bændum á ríkisjörðunum Kirkjuferju og Kirkjuferjuhjáleigu í Ölfusi fyrir 47 milljónir króna. Var hann þar að gera þessum mönnum greiða af einhverjum ástæðum.

Ríkislögmaður taldi að þessi kaup væru ólögleg þar eð heimildar Alþingis var ekki leitað fyrir þeim eins og kveðið er á um í 40. grein stjórnarskrárinnar. Fór málið fyrir Héraðsdóm og Hæstarétt og töpuðu bændurnir málinu á báðum stigum. Komust dómstólar að þeirri niðurstöðu að ríkið þyrfti ekki að efna samning Steingríms. 

Man semsagt ekkert frá hverjum ég stal þessu. Þetta eru nú ekki nema tvær stuttar málsgreinar svo varla verð ég hengdur fyrir það.

Sólarlagið að skella á.

Athugasemdir

[Emil Hannes Valgeirsson, 7.2.2011 kl. 01:02]

Góður stíll og myndmál að venju. Samt ein villa.

[Jóhannes Laxdal Baldvinsson, 7.2.2011 kl. 06:33]

Ritfærir menn skera sig úr á blogginu. Og orðaforði þeirra er miklu meiri en annarra. Ekki er verra þegar þeir gerast margræðir eins og þú í fyrirsögninni. En heldurðu í raun og veru að bloggarar séu mikið að velta stílnum fyrir sér?

[Sæmundur Bjarnason, 7.2.2011 kl. 07:33]

Emil Hannes, ég er ekki hissa á villunni. Vildi samt gjarnan vita hver hún er. Þakka hrósið.

[Sæmundur Bjarnason, 7.2.2011 kl. 07:39]

Jóhannes, svarið við spurningu þinni er: "Bæði og."

Stíll er ekkert endilega meðvitaður. Ritstíll (eins og annar stíll) held ég að komi oft ósjálfrátt með æfingunni. Orðaforði ásamt tvíræði eða margræðni er auðvitað hluti af stíl. Lélegur stíll stafar oft af of litlum yfirlestri. Líka getur hann (yfirlestrarskorturinn) valdið ýmiss konar misskilningi sem vel má komast hjá.

[Jóhannes Laxdal Baldvinsson, 7.2.2011 kl. 08:03]

Sæmi, villan er í orðinu Nausynlegt.  Notarðu aldrei púkann til að leiðrétta innsláttarvillur?

[Sæmundur Bjarnason, 7.2.2011 kl. 08:11]

Takk Jóhannes. Nei, ég nota púkann aldrei. Venjulega finn ég svona einfaldar villur við yfirlestur.

[Emil Hannes Valgeirsson, 7.2.2011 kl. 11:44]

Já það var bara þetta orð „nausynlegt“ sem ég sá. Annars benti ég á á þetta í hálfgerðri stríðni af því að ég veit að þú leggur mikið upp úr því að skrifa villulaust. Sjálfur nota ég oftast púkann sem finnur yfirleitt einhverja prentvillu. Það væri líka gaman að fá forrit sem finnur hugsanavillur.

[Sæmundur Bjarnason, 7.2.2011 kl. 12:16]

Já, Emil Hannes. Ég hugsa að ég mundi ekki nota hugsanavillupúka en setningafræðilegan púka mundi ég hugsanlega nota. Mér finnst ég ekki þurfa á stafsetningarpúka að halda en hann finnur samt ýmislegt.

[Jóhannes Laxdal Baldvinsson, 7.2.2011 kl. 16:59]

Við þurfum ekki hugsanavilluforrit meðan við höfum Höllu Gunnarsdóttur og Sóleyju Tómasdóttur

[Óskar Þorkelsson, 7.2.2011 kl. 17:57]

góður JLB :)