990 - Skýrslan eina

Jæja, þá er friðurinn skollinn á. Ekkert rifist í athugasemdakerfinu mínu og ekkert ort lengur. Veit ekki hvort ég á að vera svekktur eða ánægður. Ef Steini Briem eða Jóhannes Laxdal rekast hingað þá passa þeir sig á að kommenta ekki. Skil þá vel.

Hef hlustað á margt og mikið um skýrsluna frægu í dag. Mest kemur mér á óvart hve illa er staðið að ákvörðunum á efstu stigum stjórnsýslunar. Fundargerðir fáar og lítið um skýrslur sem skýra ástæður aðgerða. Get ekki varist þeirri hugsun að raunveruleg ástæða fyrir því hjá þeim sem að þessu stóðu sé sú að fela slóð sína ef og þegar þessar ákvarðanir verða skoðaðar í nýju ljósi.

Flestir virðast sammála um að skýrslan sé nokkuð góð og afdráttarlaus. Eftir er að sjá hvaða áhrif hún hefur. Viðbrögð Alþingis skipta mestu máli. Hræddur er ég um að þar verði hver höndin upp á móti annarri og lítið gert. Aðgerðarleysi sérstaks saksóknara er líka farið að stinga í augu og verður ekki þolað endalaust af almenningi.

Það er tilraun til að sleppa billega að segja að allt sé þetta bölvuðum bankamönnunum og kaupsýslumönnunum að kenna. Stjórnmálamenn og embættismenn geta með engu móti hvítþvegið sig. Þeir hefðu átt að gera betur. Verði skipaður landsdómur er áreiðanlegt að hann tekur með vettlingatökum á þessu öllu.

Áberandi er hve margir hafa orð á því hve Ingibjörg Sólrún sleppi vel hjá skýrsluhöfundum. Hún fékk þó sitt tækifæri í landsstjórninni, klúðraði því og fær örugglega ekki annað. Björgvin G. Sigurðsson virðist halda að hann eigi enn tækifæri til einhvers í stjórnmálum. Svo er ekki.

Og nokkrar myndir:

Bökum snúið saman. Myndin tekin í Fossvogi.

Þessi kemst víst ekki lengra að sinni.

Horft til himins.

Útilistaverk í Kópavogi.

Bónus-hjólatík á villigötum.

Athugasemdir

[Grefillinn Sjálfur - Koma svo! 14.4.2010 kl. 22:16]

Já, það reyna allir að þvo sjálfa sig. Mátti svo sem búast við því, er það ekki?

Það mun líða langur tími þar til þessi sár eru gróin.

Ég verð sennilega dauður. Ekki samt gaman að þurfa að eyða restinni í þetta argaþras.

[Hrannar Baldursson, 14.4.2010 kl. 22:24]

Íslenska þjóðin er skák og mát. Enda fullt af peðum sem telja sig kónga og drottningar.

Þarf ekki bara að raða upp aftur, og vanda leiki næstu skákar töluvert betur?

[Grefillinn Sjálfur - Koma svo! 14.4.2010 kl. 23:12]

Ég sé hvorki Drottningu né Kóng ... bara peð.

Þannig er ekki hægt að tefla.

[Grefillinn Sjálfur - Koma svo! 14.4.2010 kl. 23:12]

... einstaka Hrók.

[Sæmundur Bjarnason, 14.4.2010 kl. 23:37]

Takk báðir. 

Sléttum hróður teflum taflið
teyjum þráðinn snúna.

Þetta er vísa ort undir afdráttarhætti (minnir mig hann heiti) eftir Svein frá Elívogum. Seinni parturinn verður til ef fyrsti stafurinn er tekinn framan af hverju orði í þeim fyrri.

Snilldarlegasta vísa undir þessum hætti er eftir Jóhannes úr Kötlum og er svona:

Drósir ganga, dreyrinn niðar.
Drjúpa skúrir.

[Grefillinn Sjálfur - Koma svo! 15.4.2010 kl. 00:47]

Já, flott. Aldrei séð svona vísur áður (svo ég muni). En þetta á líklega að vera "teygjum" en ekki "teyjum" þarna í annari línu fyrri vísunnar.