897 - Vísnablogg

Er bloggið mitt að breytast í vísnablogg? Kannski. Það er skárra en að það verði pólitískt blogg eða rakið fréttablogg. Verst að maður ræður ekki allskostar hvernig vísurnar verða sem maður setur saman. Vísur eiga vel heima í athugasemdum þykir mér. Vel má líka nota þær í bloggin sjálf. Einkum ef þær eru sæmilegar.

Gísli Ásgeirssson gerir þetta oft ágætlega í sínu bloggi og hann er þar að auki bæði fjölfróður og fyndinn. Hefur einnig ágætis tök á limrum sem ég hef næstum aldrei getað sett saman. Sömuleiðis eru blogg Páls bróður hans þannig að helst ekki má missa af þeim. Stundum er samt erfitt að fylgja honum eftir því hann bloggar hér og þar. Síðast þegar ég vissi var hann á Eyjunni en þar áður í húsmennsku hjá Gísla bróður sínum.

Mér leiðast Icesave-umræður. Pældi samt í gegnum umræður um það efni sem Emil Hannes fór af stað með. Er sammála honum um að siðferðislega er ekki hægt annað en samþykkja að greiða þetta. Lagakróka og þessháttar er hægt að nota í báðar áttir. Pólitískir flokkar ráða of miklu um afstöðu fólks í þessu máli og útlendingahatrið er alltof áberandi.

Íslendingaval minnir mig að atkvæðagreiðslan um Icesave sé kölluð á Eyjunni. Þetta er markverð tilraun og verður Eyjunni eflaust til álitsauka ef vel tekst til. Hugsa að ég taki samt ekki þátt. Finnst málefnið ekki henta nógu vel.

 

Athugasemdir

[Ólafur Sveinsson 16.12.2009 kl. 09:05]

Engar athugasemdir. Íslendingaval er út í hött, eins og mál standa í dag.

[Jóhannes Laxdal Baldvinsson, 16.12.2009 kl. 09:26]

Um það veit ég ekki neitt
Á þó ekki á því von
að Sæmi bloggi útí eitt
eins og Jónas kristjánsson

 

[Jóhannes Laxdal Baldvinsson, 16.12.2009 kl. 12:13]

Þótt mörgum sé í hamsi heitt
og hengja vilji álf og strump
Á mér bítur ekki neitt
Indefence er bara prump


p.s til glöggvunar þá hefur Jóhönnu verið líkt við álf og Steingrími við

strump :)

[Sæmundur Bjarnason, 16.12.2009 kl. 14:42]

Allt er nú sem orðið nýtt,
Icesave, Moggi og Dabbi.
Á Eyju skal nú öllu hlýtt
í óttalegu kvabbi.

[Anna Sigríður Guðmundsdóttir, 16.12.2009 kl. 15:14]

Alltaf upplífgandi að kíkja á bloggið þitt Sæmi. Þjóðaratkvæðagreiðsla er jákvæð svo framarlega sem skiljanleg og sanngjörn rök fylgja atkvæðagreiðslunni. Ef fólk getur ekki rökstutt atkvæðið sitt á réttlátan og málefnanlegan hátt er líklegt að áróður og upplýsinga-skortur hafi haft áhrif á viðkomandi.

Atkvæðagreiðslu fylgir ábyrgð. Þessu höfum við Eyjaskeggjar alltof oft gleymt.

Haltu endilega áfram með vísurnar á blogginu

[Kama Sutra, 16.12.2009 kl. 18:36]

Flottir þessir tveir linkar í færslunni.   Mér finnst ég eiga pínulítið í þeim...

[Hrannar Baldursson, 16.12.2009 kl. 18:40]

Svo þú vitir af því félagi, þá vísa ég í þessa síðustu færslu þína vegna ICESAVE málsins.

[Sæmundur Bjarnason, 16.12.2009 kl. 19:13]

Takk Hrannar. Mér dettur ekki í hug að halda að þetta mál sé einfalt. Heimspekilegar hugleiðingar hagga samt ekki sannfæringu minni um þetta. Viðurkenni samt að hún byggist ekki bara á siðfræði heldur einnig að einhverju leyti á þeim pólitíska veruleika sem ríkir hér á Íslandi.