365. - Um gúgl- og bloggvæðingu hugarfarsins

Greinin sem ég sagði frá í gær og Salvör Gissurardóttir hafði bent á, er stórgóð, en alltof löng. Hún heitir: „Is Google making us stupid?" og fjallar einmitt um hvað attensjón-spannið er orðið lítið hjá fólki. Helst á allt að vera niðursoðið í klipp sem eru í hæsta lagi ein til tvær mínútur. Bóklestur fer minnkandi enda kallar hann á að hugsað sé um sama hlutinn langtímum saman. Helst vill fólk bara fá hljóð og mynd. Lestur truflar og kallar á einbeitingu og umhugsun. Þess vegna eru kvikmyndir og sjónvarpsseríur svona vinsælar. Þar er stöðugt áreiti, samt er hægt að gera eitthvað annað á meðan og þarflaust að hugsa.

Það er ekki fjarri lagi að kalla þetta gúglvæðingu hugarfarsins. Nú er svo komið að hægt er að verða sér úti um hverskyns upplýsingar á örskotsstundu um allt milli himins og jarðar og allt á það vera í hæfilega litlum bútum. Enginn nennir lengur að einbeita sér nema í smástund að sama málinu. Ekki veit ég hvar þetta endar. Heilinn í fólki breytist sennilega smátt og smátt. Líklega er ég með gamaldags heila enda leiðast mér kvikmyndir.

Það er meðal annars af þessu sem ég þori ekki með neinu móti að hafa bloggin mín mjög löng. Þá hættir fólk fljótlega að lesa nema það hafi því meiri áhuga á mér eða málefninu sem til umræðu er. Ef ég blogga langt mál um lítið efni (sem auðvitað er skemmtilegast) þá get ég alveg reiknað með því að lesendur mínir gefist fljótlega upp. Eða er það ekki?

Mér fannst fyndið að sjá Svarthöfða lalla á eftir prestaskrúðgöngunni í fréttunum um daginn. Sumir umhverfast út af svona löguðu og tala um að verið sé að niðurlægja þá sem trúa í einlægni. Mér finnst alls ekki svo vera. Mér fannst Svarthöfði (og líklega líka þeir sem gerðu hann út - þó ég viti ekkert hverjir það voru) bara vera að gera grín að þessari prósessíu, alveg burtséð frá hverju trúað er, ef einhverju.

Umræður um trúmál fara mjög oft út í einhverja vitleysu þó menn vilji gjarnan hemja sig. Alhæfingar vaða upp. Kristnir menn eru nú svona og hinsegin. Vantrúar menn gera þetta og hitt. Það er afskaplega fljótlegt að lenda í tómu bulli ef maður hættir sér í umræður um trúmál. Þá er nú betra að ræða um eitthvað sem maður hefur örlítið vit á. Þeir sem ættu að hafa vit á trúmálum eru oft manna fljótastir til að leiða slíkar umræður á villigötur. Sumir hafa líka gaman af löngum svarhölum og gera í því að æsa menn upp í trúmáladeilur í bloggheimum.

Athugasemdir

[Guðbjörn Guðbjörnsson, 14.6.2008 kl. 17:15]

Það er reglulega gaman að lesa pistlana þína og mér finnst þeir alls ekki of langir, en ég þekki þessa tilfinningu að finnast bloggin vera orðin og löng og að líklega nenni enginn að lesa þau.

Ég blogga nú líka til að koma skipulagi á hugsanir mínar um mál líðandi stundar og les annarra blogg einmitt til að sjá skoðanir þess á málefnum líðandi stundar.

Kveðja,

[Raggi 15.6.2008 kl. 08:20]

Þetta er prýðileg grein sem þú vísar í og það er sjálfsagt rétt að breytingar í upplýsingatækni, mötun og neyslu upplýsinga, muni valda einhverjum breytingum á okkar heilastarfsemi. Hins vegar þykir mér ólíklegt að hér verði um að ræða verulegar, líffræðilegar breytingar nema til langs tíma litið og að öðru óbreyttu.

Svo ber náttúrulega að athuga að breytingar eru óumflýjanlegar og oftast af hinu góða, í það minnsta er hinn valkosturinn litlu betri (stöðnun). Ekki gleyma heldur að stærstan hluta mannkynssögunnar hefur engar bækur eða langa ritaða texta verið að finna og hvað þá almennt aðgengi að slíkum verkum. Skáldsagan og langir aðgengilegir fræðitextar eru tiltölulega ný uppfinning og ekkert sem segir að okkar heilastarfsemi eigi að miðast við slíka upplýsingaröflun frekar en "gúgl-notkun".

 Svo átta ég mig ekki alveg á þessari þörf þinni að þýða orðið "Google". Þetta er sérnafn, óþarft að þýða það nema við viljum fara að þýða öll ensk fyrirtækjaheiti. Ef svo er, þá legg ég fram eftirfarandi:

Nike = Níka

Carlsberg = Karlaberg

iPod = Ípóður

Levi's = Hans Leví

Af hverju að stoppa þar? Þýðum mannanöfn líka:

Steve Jobs = Stefán Vinnur

George Bush = Georg Runni

Tiger Woods = Tígrisdýr í Skóginum

Afsakið stælana. Svona "ofþýðingar" fara ógurlega í taugarnar á mér. 

[Sæmundur Bjarnason, 15.6.2008 kl. 20:02]

Er sögnin að gúgla þýðing? Ekki finnst mér það. Mér finnst það að gúgla einfaldlega hafa unnið sér nokkurn þegnrétt í málinu. Frekar ljótt í ritmáli samt en talsvert notað í talmáli.

[Lára Hanna Einarsdóttir, 15.6.2008 kl. 21:38]

Innilega sammála þér, Sæmi. Sjálf nota ég orðið gúgla og ekki einu sinni innnan gæsalappa, einmitt vegna þegnréttarins sem þúnefnir. Ljótt eða ekki ljótt - það er mikið notað. Mér finnst dæmin sem Raggi kemur með alls ekki sambærileg.

Og ég les alltaf pistlana þína frá upphafi til enda - sama hve langir þeir eru.