882 - Þrjár bækur

Las nýlega bók eftir Ragnhildi L. Guðmundsdóttur sem hún nefnir „Býrðu í glerhúsi - fjölskyldusaga." Ekkert útgáfuár er að finna á bókinni en hún er örugglega nýkomin út. Fékk hana á bókasafninu. Í henni rekur höfundur æfi eiginmanns síns Rögnvaldar Helgasonar, sína eigin og síðan sögu fjölskyldunnar. Þau hafa bæði lent í ýmsu og börnin þeirra líka og um margt minnir bókin öll á fremur langa blaðagrein. Einkum síðari hluti hennar. 

Aðrir sem til þekkja mundu eflaust segja þessa sögu öðru vísi en hún er samt á margan hátt athyglisverð og heldur manni föngnum. Prófarkalestur er lítill og nokkuð um stafsetningar- og málvillur. Höfundinum liggur margt á hjarta og hún segir vel frá. Eiginmaður hennar var um tíma á vistheimilinu að Breiðuvík og einnig á Kumbaravogi. Sjálf varð hún fyrir einelti í æsku og börn þeirra hjóna hafa einnig lent í ýmsum hremmingum.

Önnur bók sem ég las nýlega kom út árið 1954, heitir „Æskustöðvar" og er eftir Jósef Björnsson frá Svarfhóli. Svarfhóll þessi er í Borgarfirðinum og þar ólst Jósef upp. Bók þessa las ég spjaldanna á milli af miklum áhuga og er hún þó bara lýsing á venjulegu fjölskyldulífi á venjulegum sveitabæ í lok nítjándu aldar. Sennilega segir það meira um mig en það sem ég les að ég hef mestan áhuga á hlutum sem gerðust fyrir mitt minni.

Þriðju bókina hef ég verið að glugga í undanfarið. Hún nefnist Almanak hins íslenska þjóðvinafélags 2010 og árbók Íslands 2008. Þessi bók er mjög merkileg og fróðleg. Samskonar bók er gefin út á hverju ári held ég. Fyrir löngu keypti ég Almanakið stundum sérprentað því það var svo ódýrt. Í því er samþjappaður mikill fróðleikur. Mest fer fyrir ýmsum upplýsingum um gang himintungla, flóðatöflum og svo að sjálfsögðu almanakinu sjálfu.

Einhvern tíma á Alþýðusambandsþingi eða LÍV-þingi hlustaði ég á Ásmund Stefánsson og einhverja fleiri ræða um bækur og bóklestur. Það undraði mig mest að svo virtist sem þeir færu aldrei á bókasöfn og þekktu þau ekki. Bókasöfnin eru algjörlega ómissandi fyrir alla þá sem ekki vaða í peningum og ég hef aldrei getað fyrirgefið Jóhannesi Helga að hafa á sínum tíma bannað að bækur sínar væru til útláns á bókasöfnum. Þær voru það nú samt.

881 - Málþóf

Mikið er rætt um hvers vegna hrunið hafi orðið og hvar öll vitleysan hafi byrjað. Mér finnst það engu máli skipta. Mestu skiptir að sætta þau öfl sem hæst hafa. Einnig að halda friðinn. 

Mörg blogg les ég reglulega. Þar á meðal er blogg Ómars Þ. Ragnarssonar. Margir hafa álasað honum fyrir að bjóða ekki fram í síðustu kosningum eins og í kosningunum þar á undan. Þess í stað gekk hann í Samfylkinguna. Mér er óskiljanlegt hvers vegna hann nær engum frama þar. Í krafti þekkingar sinnar á mörgum hlutum, reynslu, sáttfýsi og heiðarleika er hann einn af fáum stjórnmálamönnum sem ég mundi treysta til að hafa þjóðarheill ávallt að leiðarljósi. Verst hvað hann er stundum viðutan og svo finnst sumum hann eflaust of mikill náttúruverndarsinni.

Alþingi Íslendinga setur stórlega ofan þessa dagana. Ég hef ekki í hyggju að úttala mig um það sem þar er rætt en óttast samt að þrjóskan og þvergirðingurinn séu að verða of ráðandi. Málþóf er alltaf afsakanlegt af hálfu þeirra sem beita því. Stjórnarandstaðan á enga heimtingu á því að fá að ráða dagskrá þingsins.

Andstæðingar Icesave tala stundum eins og þeir haldi að nóg sé að segja „fussum fei" þá hverfi þær skuldir bara út í hafsauga. Stjórnarliðar hóta hinsvegar að ýmislegt geti komið fyrir ef frumvarpið verði ekki samþykkt sem allra fyrst.

Sú hugsun verður áleitin að margir í stjórnarandstöðinni vilji fremur koma stjórninni frá en að lagfæra Icesafe-frumvarpið.