446. - Þetta HelguGuðrúnarmál er merkilegt og sýnir í hnotskurn stjórnunaraðferðir Moggabloggsguðanna

Helga Guðrún Eiríksdóttir (blekpenni.blog.is) lætur þess getið á sínu bloggi að tekið hafi verið fyrir að hún geti bloggað um fréttir á mbl.is. Þetta sé gert vegna endurtekinna kvartana.

Ég hef hingað til ekki lesið blogg Guðrúnar nema öðru hvoru en vel getur verið að hún hafi misnotað möguleikann á að linka í mbl.is fréttir. Hún er þó ekki ein um það því ég held að þeir séu örugglega fleiri. En auðvitað skiptir bara máli hvað Moggabloggsmenn telja misnotkun. Þetta með endurteknar kvartanir held ég að skipti engu máli. Lítur bara betur út.

Þeir Moggabloggsmenn vilja ekki gefa út nákvæmar reglur um það hvernig á að haga sér á Moggablogginu því þeir vilja geta túlkað reglurnar eftir aðstæðum hverju sinni. Þannig stjórna harðstjórar. Þeir sem brjóta af sér vita aldrei með vissu hvað það var sem þeir gerðu rangt. Auðvitað hefði verið eðlilegt að aðvara hana áður en svona ráðum er beitt.

Salvör Gissurardóttir lét þess getið þegar hún byrjaði að blogga hér að eigendur bloggsvæðisins hefðu ótal ráð til að hafa áhrif á það hvernig skrifin hér væru. Það hafa þeir að sjálfsögðu og beita sínum aðferðum vægðarlaust. Við skulum muna að við erum hér að leika okkur á svæði sem Morgunblaðið á og höfum ekki aðra kosti en að hlýða eða fara.

Margir hella úr skálum reiði sinnar í kommentakerfi Guðrúnar og er það að vonum. Sjálf segir hún í kommentakerfinu að hún geti ekki hugsað sér að blogga eftir að rétturinn til að linka í fréttir er frá henni tekinn.

Sjálfur linka ég ekki í mbl.is fréttir og samt er bloggið mitt eitthvað lesið. Áskoranir um að loka því hafa þó birtst í kommentakerfum en mér er ekki kunnugt um að ég hafi verið klagaður til stjórnenda bloggsins. Ég vil endilega skora á Helgu Guðrúnu að halda áfram að blogga. Með því sýnir hún að hún er stærri en þeir Moggabloggsguðir. Það var hún sem klukkaði Sigurð Hreiðar og hann klukkaði síðan mig. Kannski er það þessi saklausi leikur sem klukkið er sem fer svona óskaplega í taugarnar á goðunum.

Moggabloggsguðirnir segja í dag að vandamálið sé tengingar í fréttir mbl.is. Á morgun kunna þeir að segja eitthvað allt annað. Fyrir nokkru kipptu þeir Vilhjálmi Erni Vilhjálmssyni útaf forsíðubloggaralistanum, mig minnir að þeir hafi sagt að skrif hans væru of einhæf. Þeir endurskoðuðu þá ákvörðun og breyttu henni eftir kvörtun frá Vilhjálmi. Hugsanlega er þeim ekki alls varnað.

Athugasemdir

[Steingrímur Helgason, 10.9.2008 kl. 00:11]

Mitt innra kíkerí nóterar á svipuðum & þínum ...

[Óskar Þorkelsson, 10.9.2008 kl. 00:12]

sammála þér.. og ég hef fengið nokkrar kvartanir af moggabloggritstjórum.. oft illa rökstuddar. 

Það eru nokkrir bloggarar sem stunda það að kvarta yfir þeim sem ekki eru þeim að skapi eða eru skoðanabræður þeirra.. td Villi í köben, jón valur og fleiri sem ritskoða sín "spjöll" og kvarta og kveina yfir þeim sem ekki eru á sömu skoðun.  

[Beturvitringur, 10.9.2008 kl. 00:43]

Ætti það að særa nokkurn mann eða hryggja þótt annar skrifi athugasemdir eða hugleiðingar, við frétt eða annað. Tenging við tölvur (s.s. IP) vísar á ritarann og/eða nafn og ætti að duga. Ekki fæ ég séð að athugasemd við frétt, breyti fréttinni til hins verra.

[Malína 10.9.2008 kl. 02:10]

Fólk getur hæglega bloggað út frá efni ákveðinnar fréttar án þess að þurfa að tengja bloggið sitt beint við mbl.is fréttina.  Þetta gera margir hérna á Moggablogginu - og auðvitað einnig á öðrum bloggsvæðum.  Er fólk almennt að sækjast eftir þessari mbl.is fréttatengingu til að reyna að fjölga lesendum á blogginu sínu?

[Emil Hannes Valgeirsson, 10.9.2008 kl. 11:50]

Það hlýtur allavega að vera erfitt að vera blaðamaður í dag á mbl og þurfa sífellt að þola misgáfulegar athugasemdir og stundum málfarsleiðréttingar frá bloggurum. Stundum held ég að fólk lesi jafnvel ekki alla fréttina en fari beint í athugasemdirnar. Já ég held að mjög margir bloggarar noti fréttatengingar til að fjölga lesendum og það kæmi mér ekki óvart að fréttamiðlar geri breytingu á þessu fyrirkomulagi í framtíðinni.

[Skúli Pálsson 10.9.2008 kl. 16:30]

Frjálsir og óháðir bloggarar eru ekki á Moggabloggi heldur 123.is).

[Sæmundur Bjarnason, 10.9.2008 kl. 16:42]

Já, en 123.is kostar og bilar þar að auki of oft fyrir minn smekk. Auk þess sem Moggabloggarar eru fleiri en 123.is bloggarar.

[Brynjar Jóhannsson, 10.9.2008 kl. 19:32]

Helga ??? ... Nei hættu nú alveg.. Þetta er nú meira ruglið. hún er alveg yndisleg kona.

[alva 10.9.2008 kl. 22:55]

þetta eru óttalega trénaðir rabbarbarar þessir stjórnendur á moggablogginu, þeir vilja örugglega bara eitthvað barnalandsblogg hérna....