1303 - Hafragrautur og fleira

Alveg er mig búið að hlakka til þess í allt kvöld að fá mér kornflex. Já, ég er svo skrýtinn að ég borða frekar kornflex á kvöldin en á morgnana. Auðvitað á maður ekki að éta meira en nauðsynlegt er. Ég hugsa að ég gæti alveg sofnað þó ég æti ekki allt þetta kornflex (mjólk og sykur auðvitað í viðbót). Þar með gæti ég kannski losnað við ístruna. Undar örlög þessi ístra. Ég var ekkert tiltakanlega feitur held ég þegar ég var ungur. En það er svo margt sem breytist. 

Sumir eru hissa á því að ég skuli hrósa sjálfum mér á þessu bloggi sem ég á einn og sjálfur. Mín afsökun er sú að ef ég hrósa mér ekki sjálfur þá gera það engir, hvernig sem á því stendur. Og hróssins þarfnast ég. Auðvitað reyni ég að gera það á þann hátt að alveg eins megi taka því sem einhverju gríni en vitanlega er mér full alvara.

Mér finnst alveg herfilegt að sjá ekkert nema hríðarbyl útum gluggann meðan ég er að skrifa þetta. Í alvöru talað finnst mér að veðurguðirnir eigi ekki að láta svona. Það er útaf fyrir sig að hafa leiðindaveður í janúar og jafnvel eitthvað fram í febrúar en að halda áfram langt fram í mars er algjör óþarfi. Það má alveg fara að vora svolítið.

Konan mín skipaði mér að fara í tramparaskóna mína áður en ég færði fuglunum morgunverðinn. Ég fattaði nú ekki alveg þetta með tramparaskóna en sennilega átti ég að slétta morgunverðarborðið sem mest áður en ég léti þá fá matinn. Svo kom haglél og sennilega fer allt á kaf áður en tími vinnst til að éta þetta sælgæti.

Nú hamast einhverjir við að auglýsa hafragraut. Bara af því að mér þykir hann góður. Sumir eru svo vitlausir að halda að hafragraut sé bara hægt að búa til úr Sólgrjónum. Svo er samt allsekki en mér finnst ágætt að ímynda mér að einhverjir séu svona vitlausir. Sjálfur geri ég minn hafragraut oftast úr Euroshopper haframjöli því það er ódýrast.

Hef verið að deila við einhvern AÁÍ (Afdrifaríkasta ákvörðun Íslandssögunnar) í kommentakerfinu hjá Svani Gísla Þorvaldssyni. Þetta eru athugasemdir við færslu sem heitir „Yndislegt" og er einskonar Icesave-deila og ég hvet alla sem hafa mikinn áhuga á því máli (eru víst orðnir fáir) til að kíkja.

Hef verið að skoða gömul blogg eftir mig. Get ekki varist þeirri hugsun að bloggin mín hafi verið miklu skemmtilegri áður fyrr. Mest hef ég skoðað endurminningar og margt skemmtilegt hefur rifjast upp fyrir mér. Varla eyk ég ánægju lesenda þessa pistils með því að halda því fram að áður hafi ég skrifað skemmtilegri blogg. Það er líka hægt að halda því fram að mér fari sífellt fram við skriftirnar. Dægurmálin leiðast mér skelfilega svo einkum eru þetta allskonar hugleiðingar núorðið eftir að skrúfast hefur að mestu fyrir endurminningarnar.

Allt á kafi í snjó. Eða þannig.

Athugasemdir

[Ólafur Sveinsson 19.3.2011 kl. 02:23]

Þú ert nú stundum altof lítillátur, eða reynir að vera það.  Ég hef lítið gert annað en að skjalla þig, sem frekast ég má. Sendi gamlar vísur.
Sæll vert Sæmundur kæri
sóma vafinn
Sendi ég þér sárfá stefin,
sem þó ekki verða gefin.
Forláttu þó finnist hér ei fimir sprettir.
Aftur ljóð sem stundir styttir,
stílaðu mér, - þá erum kvittir.
BB

[Guðmundur Bjarnason 19.3.2011 kl. 07:35]

Sæll Sæmi.

Laugardagsbloggin bera af hjá þér og mörgum öðrum. Kærar þakkir fyrir mig.

Kveðja

[Jóhanna Magnúsdóttir, 19.3.2011 kl. 08:31]

Þessi siður tíðkaðist á mínu heimili, pabbi barnanna minna fékk sér "morgunmat" á kvöldin og þau lærðu það af honum - og gera enn ;-) .. 

[Sæmundur Bjarnason, 19.3.2011 kl. 09:36]

Óli Sveins er alltaf eins
ógurlegt með flaður.
Látlaus pín
hans loks nú dvín
hann lætur eins og maður.
Vetrar þraut
nú veltur braut
þá verður Óli glaður.

[Sæmundur Bjarnason, 19.3.2011 kl. 09:39]

Guðmundur, kannski lestu bara betur á laugardagsmorgnum því þá er helgin framundan og svoleiðis.

Annars hef ég tekið eftir því líka að lestur er meiri á laugardögum en flesta aðra daga.

Njóttu vel.

Kveðja, Sæmundur

[Óskar Þorkelsson, 19.3.2011 kl. 09:40]

ég ét þetta fuglafóður hvenær sem er ;)

[Sæmundur Bjarnason, 19.3.2011 kl. 09:44]

Jóhanna, ég hef alltaf verið mun meira fyrir að éta á kvöldin en á morgnana. Hefur samt oft verið sagt að það sé ekki heilsusamlegt. Svarið frá mér hefur oftast verið að þegar líkaminn hvort eð er sefur geti hann hundskst til að melta líka.

Það er fyrst núna á efri árum sem ég sé hve vitlaust þetta er. Á samt erfitt með að breyta til.

[Sæmundur Bjarnason, 19.3.2011 kl. 10:00]

Takk, Óskar. Og nú fylgjumst við með því út um gluggann hvernig þröstunum og störrunum líkar við sitt fuglafóður, sem búið er að setja fyrir þá á trampaðan snjóinn. :)

[Óskar Þorkelsson, 19.3.2011 kl. 10:14]

mör með korni, gerðar kúlur og hengt upp í tré er vinsælt hjá smáfuglunum..

kjöt og afgangar gott fyrir krákurnar..

[Sæmundur Bjarnason, 19.3.2011 kl. 10:32]

Takk Óskar. Krákurnar eru víst farnar. Krummi reddar málunum kannski og svo gætu helvísis mávarnir komið hvenær sem er.