255. - Um stéttaskiptingu á Moggablogginu og fleira

Geir harði vill veita Villa greyinu tilfinningalegt svigrúm.

Geir sér greinilega eftir því að hafa bundið trúss sitt við hann, en neyðist til að sætta sig við að hann hætti. Samkvæmt nýjustu fréttum vill Davíð þó að Villi þrauki enn um sinn. Þetta virðist ætla að verða athyglisvert drama í Sjálfstæðisflokknum. Ekki held ég samt að hann klofni. Stórir flokkar gera það yfirleitt ekki.

Þegar ég var innan við tvítugt var ég öldungis viss um tvennt. Að ég mundi deyja ungur og að ég ætti eftir að verða frægur rithöfundur. Hvorttveggja þarfnast greinilega endurskoðunar. Ungur dey ég varla úr þessu og til að verða rithöfundur (tala nú ekki um frægur) held ég að tvennt þurfi að koma til. Gott vald á málinu og að hafa frá einhverju að segja. Ég tel mig hafa allgott vald á íslenskunni (loksins), en því miður hef ég ekki frá neinu að segja.

Ég hef eiginlega aldrei lent í neinu. Ekki framhjáhaldi, ekki skilnaði, ekki stórfelldum skattsvikum. (Jú, ég smurði alltaf svolítið á allan kostnað og vexti hérna áður fyrr, en hver gerði það ekki?) Ekki hef ég lent í dópi og drykkju. Ekki einu sinni í andlegum mótbyr eins og nú er í tísku. Að minnsta kosti ekki alvarlegum.

Ekki hef ég lent í bílslysi, ekki í neinum afbrotum, sem orð er á gerandi. Einu sinni var ég þó kærður fyrir að hafa lagt bíl ólöglega, en þegar til átti að taka og ég ætlaði að mótmæla hástöfum þá var kæran týnd.

Auðvitað er hægt að ljúga öllu mögulegu í skáldsögu, en ég held  að það verði aldrei sennilegt ef maður hefur ekki lent í neinu sjálfur. Jú, ég gæti líklega orðið alkóhólisti ennþá ef ég vandaði mig, en trúlega er margt af þessu sem ég taldi upp að verða of seint fyrir mig, en með einbeittum brotavilja er þó margt hægt.

Já, og nú geta menn keypt sig frá auglýsingum og meira að segja þannig að aðrir sem fara á bloggið manns þurfi ekki að horfa á þær. Eins og ég sagði á kommenti í gær eða í dag þá þýðir þetta náttúrlega að allir geta séð hvort maður tímir að borga 300 kall á mánuði til að vera með aðlinum eða heldur bara áfram að vera sá nískupúki sem maður hefur verið hingað til.

Eins og Gunnar Helgi Dennason segir réttilega á sínu bloggi þá er þetta að sjálfsögðu byrjunin á stéttaskiptingu hér á Moggablogginu. Þó ég sé síst af öllu einhver NOVA stuðningsmaður þá held ég að ég haldi áfram að tilheyra pöplinum. Sjái að minnsta kosti til hvernig þessi auglýsingamál arta sig.

Og ég sé ekki betur en Guðbjörg Hildur sætti sig ennþá við NOVA auglýsinguna. Skyldi hún ekki ætla að fara að drífa sig í að borga þrjúhundruðkallinn? Ég læt nú aðallega svona útí hana af því að hún leyfir ekki komment á sínu bloggi. (Það er líka smávísir að stéttaskiptingu) Það gerir þó Sigurður Þór og er meira að segja ótrúlega duglegur við að svara misgáfulegum kommentum.


« Síðasta færsla | Næsta færsla »

Athugasemdir

1 Smámynd: Gunnar Helgi Eysteinsson

Innlitskvitt og ps. Ég hélt að þú kæmir aldrei inn á bloggið mitt

Gunnar Helgi Eysteinsson, 20.2.2008 kl. 10:01

2 Smámynd: Sæmundur Bjarnason

Jú, jú. Ég fer oft á síðuna þína, en kommenta sjaldan þar. Yfirleitt geri ég ekki það sem ég er beðinn um, ef ég get komist hjá því.

Sæmundur Bjarnason, 20.2.2008 kl. 12:00

3 Smámynd: Lára Hanna Einarsdóttir

Kannski ertu ekkert of seinn að deyja ungur. Þetta fer allt eftir túlkun orðanna. Og auðvitað geturðu orðið rithöfundur þó að þú hafir ekki lent í neinum stórskakkaföllum í lífinu. Þú skáldar bara... Varla hefur krimmapenninn Arnaldur lent í öllu sem hann skrifar um.

En einhvern veginn sé ég þig fyrir mér með þína fyrstu bók sem einhvers konar sagnfræði... kannski verða næstu bækur svo sagnfræðilegar skáldsögur. Það held ég að færi þér afbragðsvel.

Ef það, að kaupa sig frá Nova-auglýsingunni og þeim sem á eftir koma, er túlkað sem stéttskipting á blogginu er hún helvíti billeg. Þar kom að maður tilheyrði aðli, ekki seinna vænna. Nokkrir sem ég heimsæki reglulega hafa losað sig undan auglýsingunni og mér finnst allt annað líf að koma inn á síðurnar þeirra. Þessi hreyfimyndarsóðaskapur fór í mínar fínustu taugar.

Svona erum við nú öll ólík - og allt gott um það að segja.

Lára Hanna Einarsdóttir, 20.2.2008 kl. 16:34

4 Smámynd: Kristín M. Jóhannsdóttir

Nei nei, þetta er ekki spurning um nísku, bara um það hvort maður lætur auglýsinguna pirra sig eða ekki. Mér finnst alveg sjálfsagt að greiða fyrir það að fá að hafa síðu á blogginu og ef ég get greitt fyrir það með auglýsingu þá er það bara fínt. Get þá notað 300 kr. á mánuði í eitthvað annað!

Kristín M. Jóhannsdóttir, 20.2.2008 kl. 18:18

5 Smámynd: Sæmundur Bjarnason

Þó ég tali um stéttaskiptingu og aðal er fjarri því að ég meini nokkuð illt með því. Það er samt ekki hægt að neita því að með þessu skiptast Moggabloggarar í tvo hópa og allir geta séð í hvorum hópnum hver er. Þetta finnst mér pínulítið vafasamt að gera.  

Sæmundur Bjarnason, 20.2.2008 kl. 19:39

6 Smámynd: Erna Bjarnadóttir

Er það ekki spurning um viðhorf hvort maður hefur frá einhverju að segja..... Nóg bulla nú sumir . Annars hef ég látið eins og ég taki ekki eftir NOVA en stéttaskipting... ja það var eftir moggaslektinu....

Erna Bjarnadóttir, 20.2.2008 kl. 20:05

7 Smámynd: Gunnar Helgi Eysteinsson

Sæmundur ég skil ekki alveg hvað þú meinar með þessu:
"Yfirleitt geri ég ekki það sem ég er beðinn um, ef ég get komist hjá því."

Gunnar Helgi Eysteinsson, 20.2.2008 kl. 20:36

8 identicon

Hey hey hey, þú hefur nú verið í flugvél sem hlekktist á í flugtaki, er það ekki eithhvað?  - fyrst þú ert að telja upp eiithvað sem fólk getur lent í á ævinni.

Hafdís 20.2.2008 kl. 21:09

9 Smámynd: Sæmundur Bjarnason

Gunnar Helgi, það er ekki von. Eiginlega veit ég það ekki sjálfur. Kannski finnst mér að þú ætlist stundum til að ég kommenti hjá þér, af því þú ert svo duglegur sjálfur að kommenta. Athugasemdir eru sál bloggsins ef svo má segja og mér finnst ég aldrei nógu duglegur að kommenta.

Sæmundur Bjarnason, 20.2.2008 kl. 21:57

10 Smámynd: Gunnar Helgi Eysteinsson

Núna skil ég

Ég ætlast ekki til þess að fólk skrifi athugasemd hjá mér. Mér finnst skemmtilegt að vita hver hafi komið í heimsókn og úr því að mér finnst það þá vill ég koma fram við fólk eins og ég vill að það komi ... þú skilur.
Ég er búinn að lesa allar færslur þínar og mér finnst það mjög gaman en hef látið það vera að skrifa athugasemd, bara vegna þess að það er ok hér

Gunnar Helgi Eysteinsson, 20.2.2008 kl. 22:06

Bæta við athugasemd

Ekki er lengur hægt að skrifa athugasemdir við færsluna, þar sem tímamörk á athugasemdir eru liðin.

Innskráning

Ath. Vinsamlegast kveikið á Javascript til að hefja innskráningu.

Hafðu samband