913 - To blog or not to blog

Q: Af hverju bloggar fólk? 

A: Til að láta ljós sitt skína.

Q: Af hverju vill það láta ljós sitt skína?

A: Það veit ég ekki. Kannski hefur það bara gaman af að skrifa eða er svo miklir besservisserar að því finnst að allir ættu að vera á sömu skoðun og það.

Q: Ekki blogga allir besservisserar, er það?

A: Auðvitað ekki. Sumir þeirra kunna ekki einu sinni að skrifa.

Q: Blogga þá allir besservisserar sem kunna að skrifa?

A: Það held ég ekki.

Q: En eru allir bloggarar besservisserar?

A: Auðvitað ekki.

Q: Er bloggið framtíðin?

A: Annaðhvort það eða eitthvað í líkingu við það. Það er nýtt í veraldarsögunni að allir hafi jöfn tækifæri til að láta í sér heyra. Netið er það afl sem stjórnvöld allsstaðar óttast og reyna að setja hömlur á.

Q: Er bloggari dagsins þá hinn nýji Messías?

A: Á vissan hátt, já. Veröldin verður aldrei söm eftir að Netið opnaðist öllum. Það er erfiðara að setja fólk til hliðar og þegja það í hel.

Q: Hvernig er Moggabloggið frábrugðið öðrum bloggveitum?

A: Það leyfir öllum að blogga og hvetur þá til þess. Fjöldablogg með þeim hætti hefur ekki verið á Íslandi fyrr.

Q: Hefur þá ekki bloggurum fjölgað mikið?

A: Jú, vissulega.

Q: Kannski orðnir of margir?

A: Það held ég ekki.

Q: Enn að fjölga?

A: Það veit ég ekki.

Q: Margir líta niður á bloggið.

A: Já, ég veit það.

Q: Hvernig stendur á því?

A: Það gerir fréttafíklum erfiðara að fylgjast með. Hefðbundnir fjölmiðlar eru mjög á fallanda fæti. Bullið á blogginu er líka alveg óskaplega mikið.

Q: Vinsælustu Moggabloggararnir hafa margir horfið á braut að undanförnu.

A: Já, Þar hefur pólitíkin áhrif.

Q: En þú heldur áfram hér.

A: Já, ég vil ekki láta pólitík hafa áhrif á mitt blogg. Svo er líka mjög gott að blogga hér.

Q: Stjórnendur Moggabloggsins hafa verið ásakaðir um ofsóknir og hafa lokað sumum bloggum.

A: Þeir hafa alveg látið mig í friði. Það er eðlilegt að þeir vilji hafa einhverja stjórn á sínu vefsvæði. Vinsældir mbl.is tryggðu a.m.k. í upphafi talsverðan lestur á sumum bloggum. Seint verða allir sammála um það sem sagt er þar. Held samt að stjórnmál ráði ekki úrslitum hér.

Börn (og unglingar jafnvel líka) hafa feikigaman af öllu sprengiveseni, blysum og flugeldum. Fullorðnir síður. Held að margir sprengi aðallega fyrir krakkana sína og af því að aðrir gera það. Svo er það ágætisafsökun að menn séu að styrkja björgunarsveitirnar með þessu.

Tek í hendina á sjálfum mér um hver áramót og finnst ég spara hellings pening með því að taka ekki þátt í svona vitleysu. Fyrr má nú aldeilis fyrrvera djöfulgangurinn. Er samt ekki frá því að sprengjuæðið hafi staðið skemur yfir nú en þegar verst var á útrásartímanum.

Athugasemdir

[Kama Sutra, 1.1.2010 kl. 04:48]

Gleðilegt ár, Sæmundur. Takk fyrir að leyfa nafnlausri kisumóður að nöldra stundum hérna á blogginu þínu. ;)

[Sæmundur Bjarnason, 1.1.2010 kl. 06:04]

Gleðilegt ár, Kama Sutra. Kettir eru meirháttar.

[Helga Kristjánsdóttir, 1.1.2010 kl. 09:54]

Gleðilegt ár! Þakka gestrisnina og alla pistlana.

[Ellismellur 1.1.2010 kl. 10:22]

Gleðilegt nýtt ár, ágæti skólabróðr, takk fyrir gamalt og megi nýja árið verða þér og þínum farsælt.

[Jóhannes Laxdal Baldvinsson, 1.1.2010 kl. 17:35]

Mér finnst bloggið best þegar það breytist í samtal, samtal tveggja eða fleiri. Það gerist oftast á þínu bloggi Sæmundur og því finnst mér gott að staldra hér við og leggja orð í belg ...eða ekki. Hins vegar leiðast mér blogg þar sem eru iðkaðar einræður eða vitsmunalegar skilmingar. Lifðu heill á nýju ári og bloggaðu af krafti

Bullið á blogginu er mikið

og bannfærð þau fól fyrir vikið

En Sæmi er streit

og Steini það veit

að ekki má far' yfir strikið

[Jóhannes Laxdal Baldvinsson, 1.1.2010 kl. 17:37]

þú lagfærir kannski línubilið Sæmi minn

[Sæmundur Bjarnason, 1.1.2010 kl. 19:26]

Gleðilegt ár öll og takk fyrir innlitið.

Fín vísa, Jóhannes. Get yfirleitt ekki ort limrur sjálfur. Þetta með línubilið er lítið mál. Þú notar bara shift/enter í staðinn fyrir enter.

[Brjánn Guðjónsson, 2.1.2010 kl. 00:16]

ég er því miður ekki messías (sá smurði) þar eð ég er uppiskroppa með smurefni