315. - Lítið um bílstjóramálið, en þeim mun meira um Moggabloggið

Enn og aftur verð ég að segja pass í bílstjóramálinu. Ég hef samúð með báðum þeim aðalsjónarmiðum sem uppi eru. Mér sýnist að verið sé að reyna að gera þessi mál flokkspólitísk og finnst það slæmt. Við það geta þau versnað enn. Nóg er nú samt.

Margir beturvitrungar í hópi bloggara utan Moggabloggsins láta sér detta ýmislegt í hug í viðleitni sinni til að koma höggi á það. Til dæmis má minnast á Stebba greyið Páls sem lengi vel hélt þeim sið sínum að enda hvert blogg með Cato-iskum hætti og þylja bölbænir um Moggabloggið. Að lokum varð hann leiður á þessu og hætti því og svona eins og til að hugga sjálfan sig um leið, lýsti hann því yfir að Moggabloggið væri dautt!!

Sumir útmála með mörgum fögrum orðum að ekki þurfi að vera á Moggablogginu til að geta bloggað ókeypis eða svotil að vild. Þeir gleyma bara að geta þess að það að stofna blogg og reka það á eigin léni getur kostað einhverja fyrirhöfn.

Mér finnst vel borgandi smávegis, í því formi að horfa á misleiðinlegar auglýsingar um leið og eitthvað annað er gert, til að sleppa við þá fyrirhöfn. Sumir nenna bara ekki að efna til ónauðsynlegrar fyrirhafnar og kunna jafnvel ekki óskaplega vel á tölvur og þessháttar tól. Ýmislegt getur síðan þurft að gera til þess að koma boðskap sínum á framfæri ef það er það sem bloggarinn vill.

Fyrir marga er Moggabloggið því hrein himnasending. Bloggið er í rauninni alveg nýr samskiptamáti og það er ekki von að allir geri sér grein fyrir því. Sumir, eins og til dæmis Egill Helgason hafa skrifað blogg-greinar árum saman, en vita samt ekki hvað blogg er.

Ég er búinn að vera notandi Internetsins síðan uppúr 1990 og ætti að vita eitthvað um tölvur, en finnst upplagt að láta aðra, sem jafnvel hafa gaman af þessu stússi, sjá um þetta fyrir mig.

Blogg er ekki eins manns fjölmiðill. Nema auðvitað ef það er það sem bloggarinn vill. Bloggið getur alveg eins verið aðferð til að halda sambandi við fjölskyldumeðlimi, sem dreifðir eru útum allt, eða bara eitthvað allt annað.

E-meilið er nánast búið að eyðileggja með allskyns spammi og óumbeðnum auglýsingum. Þegar spammarar verða farnir að ausa sínum afurðum yfir saklausa bloggara verður auðvelt að flytja sig til eftir þörfum og jafnvel koma sér upp sínu eigin "WordPress-i" ef starfsmenn Moggabloggsins standa sig ekki í stykkinu við að halda spamóværunni í skefjum.

Athugasemdir

[Hallmundur Kristinsson, 24.4.2008 kl. 00:32]

Maður þarf sussum ekkert að vera á moggabloggi til að blogga ókeypis. Ég blogga t.d. bæði á Vísi og blogcentral án þess að borga krónu fyrir. Á 123 borga ég hinsvegar smotterí. Það gerir Asben trúlega líka. Bið að heilsa henni.

[Sæmundur Bjarnason, 24.4.2008 kl. 21:22]

Gleðilegt sumar, Hallmundur. Ég skal skila kveðjunni. Ég átti nú eiginlega við það í sambandi við bloggsetrin að menn geti ekki bæði heimtað að ráða því sem þeir vilja og líka bloggað ókeypis. Vilji menn ráða sér að öllu leyti sjálfir getur það kostað talsverða fyrirhöfn.