292. - Ástandið við gatnamót Auðbrekku og Nýbýlavegar í Kópavogi er óviðunandi

Mikil umræða er nú um "hreysivæðingu miðbæjarins í Reykjavík." Í Útvarpinu í kvöld sagði einhver: "Ég treysti verktakanum til að.......". 

Ég treysti hinsvegar verktökum ekki til neins. Gott dæmi um yfirgang þeirra er það ástand sem búið er að vera mánuðum saman og á eflaust eftir að vera í marga mánuði ennþá á gatnamótum Auðbrekku og Nýbýlavegar í Kópavogi og götunum þar í kring.

Ég efast ekki um að það sé þægilegra fyrir verktakana að vera lengi að þessu, en hagsmunir þeirra sem þarna eiga oft leið um eru alls ekki þeir sömu. Kópavogi er stjórnað af manni sem hefur góðan skilning á þörfum verktaka.

Nú þegar harðnar á dalnum hjá auðmönnum landsins getur vel orðið þröngt í búi hjá þjóðþrifafyrirtækjum eins og fótboltafélögum og þess háttar. Frjálshyggjupostular þessa lands hafa haldið því fram að miklu heppilegra sé að fjársterkir aðilar styrki allskyns menningar og íþróttastarfsemi en að ríkið sé að vasast í þeim málum.

Varðandi þetta hafa þeir eflaust talsvert til síns máls þegar vel árar, en hver á að koma KR til bjargar ef Björgúlfur hefur ekki lengur efni á að henda í þá peningum?

Timaritið Herðubreið fékk góða auglýsingu á Stöð 2 í kvöld þar sem sagt var frá palladómi um Styrmi Gunnarsson í blaðinu og nafn Þorsteins Pálssonar ritstjóra Fréttablaðsins dregið inn í þá umræðu.

Það stefnir í skemmtilega baráttu í forsetakosningunum í Bandaríkjunum í haust. Ég veit reyndar ekki frekar en aðrir hver verður þar í framboði fyrir demókrata og kannski kemur það ekki í ljós fyrr en í sumar. Demókrataflokkurinn í Bandaríkjunum er stærri en Republikanaflokkurinn og mun fleiri styðja hann jafnan eða segjast gera það í könnunum og þar að auki er hinn óvinsæli núverandi forseti í embættinu fyrir hönd repúblikana.

Samt má búast við spennandi kosningum í haust því margt getur gerst í forsetakosningum. Íbúar Bandaríkjanna eru upp til hópa mun íhaldssamari en Evrópumenn. Mér kæmi á óvart ef Bandaríkjamenn eru raunverulega tilbúnir til að kjósa annaðhvort konu eða svertingja í þetta mikilvæga embætti. En það kemur í ljós í haust.

Athugasemdir

[Anna Benkovic Mikaelsdóttir, 27.3.2008 kl. 17:07]

...bý í Kópavoginum og þetta er orðið ansi langt ástand með nýbýlaveginn...svo ég segi ekki meir?  Eins lengi og tók að reisa heila 20 hæða blokk við Smáralindina?

[Sigurður Þorsteinsson, 28.3.2008 kl. 06:47]

Sæll Sæmundur

Ég bjó hér í Kópavoginum áður en þessi meirihluti tók við og aftur nú. Það er orðin mikil breyting. Þá var nú ekkert "daður" við verktakana. Ég man eftir vegakerfinu hér í Kópavogi. Maður var lagður í einelti sem Kópavogsbúi. Þá voru til Kópavogsbrandarar og allir voru þeir um gatnakerfið okkar. Þá vorum við með félagsmálastjórnir þannig að við vorum ekki að daðra við þetta veraldlega. Andskotans auðvaldið. Það var sálarrannsóknarfélag í Kópavoginum sem dafnaði og fólk kynntist sem hafði villst í gatnakerfinu okkar í Kópavoginum og ratað ekki út. Þá settist það bara að hér og giftist og fór að eiga börn. Ég missti púströrið undan fyrsta bílnum mínum í Auðbrekkunni, í brekkunni Dalbrekkumegin. Blótaði vesalingum í bæjarstjórninni, sem voru þá frekar hlynntir bifvélavirkjum en verktökum, enda bifvélavirkjar ekki hluti af auðvaldinu.

Ég legg til að við friðum Auðbrekkuna,- eins og hún var-. Setjum niður holurnar í göturnar aftur, ekkert malbik, bara gamli tíminn. Svo verður þjóðviljinn borinn í annað hvort hús og fiskbíllinn kemur á hverjum þriðjudegi.  

[Sæmundur Bjarnason, 28.3.2008 kl. 17:59]

Já, já. Þetta eru þínar skoðanir, Sigurður og ekkert við því að segja. Ég ætla bara að hafa mínar skoðanir um þær framkvæmdir sem nú standa yfir. Ég kannast ekkert við að hafa sagt neitt um þörfina á  þeim eða hvernig þær eru. Mér finnst þær bara taka alltof langan tíma og að það megi alveg taka tillit til þeirra sem um göturnar fara.