2604 - Væpandi vælukjóar

Var búinn að semja algjört tímamótainnslag og það átti að heita þetta. Það man ég þó. Týndi því bara sisvona. Veit ekki hvert það hefur farið ef það hefur farið eitthvað en ég kann greinilega ekki nógu vel á Word til þess að finna það aftur. Man ekkert hvað ég skrifaði í þessu úrvals bloggi mínu.

Þetta með væpandi vælukjóa er samt áreiðanlega eitthvað sem ég hef skrifað um rafrettur. Sennilega hefur það verið afskaplega gáfulegt. Mig minnir að það hafi verið eitthvað um það að e.t.v. sé sú hætta fyrir hendi að það þyki fínt að væpa. Rafretturnar munu þá breiðast út með örskotshraða. Annars er ég löngu hættur að reykja og sé ekki eftir því. Næst verður það sennilega kaffið. Finnst endilega að ég þurfi ekkert á því að halda.

Einnig skrifaði ég eitthvað um Berg Ebba Benediktsson, en hann hef ég víst skrifað um áður útaf greinum hans í Fréttablaðinu. Nú er hann að ég held búinn að skrifa bók og gott ef hún heitir ekki „Stofuhiti“. Þarf endilega að lesa þá bók.

Annað hefur kannski ekki verið neitt ákaflega merkilegt. A.m.k. man ég ekki eftir því. Sennilega hef ég bara verið með einhverjar lítt gáfulegar athugasemdir um veðrið og tíðarfarið. Veðrið er annars ágætt núna þó spáð sé að heldur fari kólnandi.

Með sigri Macrons í frönsku forsetakosningunum má segja að sókn þjóðernissinnaðra hægri afla í hinum vestræna heimi hafi verið stöðvuð. A.m.k. í bili. Macron verður samt að standa sig vel og standa við eitthvað af sínum kosningloforðum ef það á að haldast. Næsta prófraun fyrir hann eru þingkosningar í Frakklandi í júní næstkomandi. Og fyrir þann tíma þarf hann að koma saman ríkisstjórn. Fyrirkomulagið þarna er líkt því í USA. Forsetinn ræður miklu en verður samt að hafa samráð við þingið um ýmis mál. Hollande var óvinsæll og Fillon lenti í hneykslismáli.

Kannski ég drífi mig í að koma þessu út í eterinn áður en það týnist. Íslendingar eru enn á lífi í handboltanum eftir nauman sigur á Makedóníumönnum.

Einhver mynd.

Athugasemdir

[Halldór Egill Guðnason, 9.5.2017 kl. 05:27]

Ja, nú eru rauð dýr gáð og Snorrurinn Seli kominn í slæm mál!

 Góðar stundir, með kveðju að sunnan. ;-)

[Sæmundur Bjarnason, 9.5.2017 kl. 09:36]

Takk.

Það getur verið virkilega gaman að snúa málsháttum eða talsháttum við og ýmislegt þessháttar. Minn uppáhalds er: að hafa vaðið fyrir ofan sig og það er ekki hundur í hættunni. Ruglast jafnvel í því hvort ég hef sagt þetta þannig eða ekki.

Kveðja af Skaganum.