2433 - Tortóla

Húsameistari ríkisins
tók handfylli sína af leir

og Bjarni sagði ókei

Hér er ég og ég heiti
Sigmundur Davíð.

Já, já. Þetta er rammstolið frá Steini. Er það samt ekki hrós útaf fyrir sig að stela svona blygðunarlaust?

Arðgreiðslur tryggingarfélaganna og Borgunarmálið eru í þann veginn að gleymast. Kannski er vorið á næsta leiti, að sumu leyti a.m.k. (Er ég kannski að gera ypsilonvillu hér?) og þessvegna nenna menn líklega ekki að rífast endalaust.

Eru Tortólabúar allir siðlausir? Bara bankakerfið þar kannski? E.t.v. allir Íslendingar sem eiga reikninga þar? Hugsanlega allir sem tengdir eru bankakerfinu á Tortóla? Er ekki til betri mælikvarði á siðleysi? Er hugsanlegt að siðleysið sé bara ekkert tengt Tortóla? Áreiðanlega eru ekki allir siðleysingjar með bankareikning á Tortóla. Ekki einu sinni þeir íslensku. Eru peningar og eignir upphaf og endir alls? Hverlags spurningar eru þetta eiginlega?

Vestrænt lýðræði og arabiska vorið. Af hverju skyldum við vera svona upptekin af því að koma hinu svokallaða vestræna lýðræði á um allt. Og hver er fulltrúi hins margnefnda Alþjóðasamfélags? Er hið vestræna lýðræði fólgið í því að láta alþjóðleg fyrirtæki ráða því sem þau vilja? Og fá að sitja uppi með öll vandamálin? Og skríða í duftinu fyrir peningaplokkinu? Af hverju skyldu frjálsbornir Íslendingar vera tilbúnir til að fara í kílómeterslanga biðröð og dveljast þar í heila nótt bara ef bandarísk matarkeðja segist ætla að gefa þeim 10 fremstu í biðröðinni agnarögn af því sem þeir stela af hinum?

Einu sinni í fyrndinni (man alveg eftir því samt) þóttu beinar sjónvarpsútsendingar merkilegar. Svo er ekki nú. Bein útsending frá lokakeppni fyrir Júróvisíón í öðru landi er fullmikið finnst mér. Takk samt fyrir að láta fréttirnar í friði. Kannski er ég bara svona ferkantaður og horfi aldrei á svonalagað, en er þetta ekki opinber tuðsíða Morgunblaðsins.

Einkennilegt þetta með stjórnarskrána. Þeir sem sögðu einu sinni að hún væri alveg ágæt, vilja endilega breyta henni núna. Aftur á móti eru þeir sem vildu umfram allt nýja alveg á móti öllum breytingum, jafnvel þó þær gangi í sömu átt. Stjórnmálamenn eru skrýtnustu skepnur jarðarinnar. Árni Páll er jafnmikill Júdas, þó hann safni skeggi.

Frá Akranesi.

Athugasemdir

[Ellismellur 13.3.2016 kl. 20:40]

Velti fyrir mér - eins og þú - stjórnmálastöðunni eins og hún birtist manni í fjölmiðlum. Það getur varla farið milli mála að það er ekki djúpt í árina tekið að tala um að það sé titringur í stjórnarsamstarfinu. Sigmundur Davíð er annað tveggja ólíkindatól eða algjör bjáni í þessum hlutum. Að atast svona í málum, sem hann ætti að láta vera að skipta sér af eins og hann gerir trekk í trekk, hlýtur að ergja, vægt orðað, þá sem fara með viðkomandi málaflokk í stjórninni. Nægir að benda þar á afskipti hans af nýbyggingu LSH, sem er komið í ákveðinn farveg og framhjá "point of no return" ef maður má orða það þannig. Get ekki ímyndað mér að Kristján Þór sé ánægður. Nú og svo eru fleiri í einleik og nægir þar að nefna ráðherra félagsmála, sem maður gæti ætlað að væri í hörku stjórnarandstöðu og er það kannski. Guðlaugur Þór, sem er nú oftast fastur á meiningunni við að standa í móti útgjöldum og aukinni skattheimtu, var greinilega búinn að fá upp í háls í kvöldfréttum sunnudagsins 13.3. þegar hann spurði Eygló hvort hún hefði fundið leið til að spara þessa 8000.000.000,- sem auknar greiðslur í fæðingarorlofi kosta skv. tillögum nefndar hennar. Það er því alveg mögulegt, að stjórnarsamstarfið springi og það fyrr en margir ætla. Hafandi í huga úrslit í kosningum til þinga sambandslýðveldanna þýsku, þá óttast maður að komi til kosninga fljótlega, muni framsóknarmenn jafnvel enn frekar en fyrr stökkva á vagn útlendingaandúðar.