2298 - Kjósum Pírata

Hef lengi haft það á tilfinningunni að ég sé einn af síðustu Móhíkönunum hérna. Tók mig því til um daginn (alveg nýlega samt) og taldi alla þá Moggabloggsvini mína sem bloggað hafa á þessu ári (2015). Þeir reyndust vera 35 og var það mun hærri tala en ég átti von á. Samt er það svo að ég reikna ekki með að það séu margir sem hafa bloggað jafnlengi og jafnmikið og ég hér á Moggablogginu. Ég er ekkert stoltur af þessu, því þetta er einkum vegna leti. Það er fínt að láta aðra sjá um öll vandamálin en þurfa ekkert að gera sjálfur.

Ef ég á að reyna að lesa í pólitísku spilin þá held ég að núverandi ríkisstjórn sé einhver sú versta sem hér hefur setið. Sama er að segja um alþingi. Mig grunar að aldrei hafi slíkt samansafn minnipokamanna verið þar. Ekki get ég fengið mig til þess að reyna að muna eftir þeim öllum. Er þetta ekki alltaf sagt? Mest fer þetta að sjálfsögðu eftir skoðunum þess sem lætur þetta í ljós. Það er líka til siðs að ríkisstjórnir hafi lítið fylgi í skoðanakönnunum og lítið að marka það. Við þessu er ekkert að gera. Ábyrgðin er þeirra sem kusu þá flokka sem ríkisstjórnina mynda.

Góð útkoma Pírata í síðustu skoðanakönnun er alls ekki óvænt. Á margan hátt hagar sá flokkur sér eins og nýtt og ferskt afl. Þó hefur lítið reynt á samstöðuna í flokknum. Hinir þingflokkarnir eru meira og minna fastir í gamla skotgrafahernaðinum. Vinstri flokkarnir, Samfylkingin og Vinstri grænir, eru bara alveg að hverfa og forsætisráðherrann stjórnar minnsta flokknum.

Mér finnst froststillurnar sem verið hafa undafarna daga ekki sem verstar. Ágætt er að fá nokkra daga í röð sem eru líkir hver öðrum hvað veðurfar snertir. Auðvitað verður frostið og íshrönglið leiðigjarnt til lengdar. Vonandi kemur vorið bara hægt og rólega úr þessu. Eiginlega er ég alveg búinn að fá nóg af umhleypingunum í veðrinu.

Kannski eru fésbókarvírusar að verða þeir vinsælustu allra. Varla líður sá dagur að ekki fari einhverjir á kreik. Sennilega er þetta gert til þess að sem flestir verði afhuga fésbókinni. Sjálfur er ég u.þ.b. að gefast upp á henni. Dulbúningar vírusanna eru sífellt að verða betri og betri sýnist mér. Á endanum kann þetta að verða til þess að fésbókin leggist alveg á hliðina. Hvað veit ég. Hættulegast af öllu er líklega að gera eitthvað sem maður er ekki alveg viss um hvaða áhrif hefur. En hvenær er maður viss um það?

Mér finnst það óttalegur aumingjaskapur hjá bönkunum að geta ekki falið ofsagróðann betur. Eiglega er það alveg furðulegt að þeir skuli láta þetta sjást svona vel. Þó fjölmiðlarnir séu misheppnaðir að mörgu leyti þá hefur þeim tekist vel í því efni að gera fjármálafyrirtækin, og þarmeð bankana, að óvinsælustu fyrirtækjum landsins. Bankarnir eru sannkölluð einokunarfyrirtæki og keppast við að gera starfsemi sína sem óskiljanlegasta. Ef ég hefði önnnur úrræði mundi ég að sjálfsögðu geyma þessa litlu peninga sem ég á og fæ mánaðarlega frá lífeyrissjóðum og ríkinu annarsstaðar en hjá bankamafíunni. Bankastarfsemi og túristaveiðar, tvær mestu svindlgreinar landsins, eru jafnframt þær umsvifamestu. Eða það hefur mér fundist. Læt svo útrætt um þetta mikla mál.

Allskyns hjálækningar eru mikið í tísku núna. Auðvitað þykjist ég vera voðalega vísindalega sinnaður en get samt ekki neitað því, að sumt af því sem boðið er framhjá hefðbundnum lækningum verðskuldar vissulega nánari skoðun. Annars er þetta svo hættulegt umfjöllunarefni að sennilega er skást að halda sér saman.

Ský.

Athugasemdir

[Jón Valur Jensson, 5.3.2015 kl. 14:14]

Eru það ekki Píratavitleysingarnir sem fyrst og fremst vilja neyðarbraut Reykjavíkurflugvallar feiga?

Eru það ekki þeir, sem tala um, að virða eigi lýðræði, en hafna 70.000 manna undirskriftasöfnun til varnar Reykjavíkurflugvelli og óvirða 82% landsmanna og 73% Reykvíkinga í því máli?

Eru það ekki þeir ásamt VG, sem halda borgarstjórn í gíslingu, eftir að meirihluti Samfylkingar og „Besta flokks“ Gnarrista féll?

Eru „Píratar“ ekki í sjóræningjastríði gegn gatnakerfi Reykjavíkur, sem veldur stórskaða á ökutækjum, auk þess að stefna áfram að heimskulegri þrengingu gatna fyrir milljónahundruð í stað þess að leggja fé í að fylla upp í götin?

Eru „Píratar“ ekki bara nýr orðaleppur fyrir ofurróttæka, reynslulitla, óstjórntæka bolsa?

Ekkrt skil ég í þessu hliðarspori þínu, Sæmundur minn.

[Jón Valur Jensson, 5.3.2015 kl. 14:18]

Og eru ekki Píratar flokkur sem þegar er orðinn frægur að endemum. –––> http://krist.blog.is/blog/krist/entry/1597848/ (og tilvísun þar).

[Sæmundur Bjarnason, 5.3.2015 kl. 14:35]

Jón Valur minn, nei og aftur nei. Annars skil ég ekkert í þér að kjósa aftur og aftur Sjálfgræðisflokkinn en hallmæla þeim svo í hinu orðinu.

[Jón Valur Jensson, 6.3.2015 kl. 07:24]

Ég hef nú ekki kosið Sjálfstæðisflokkinn síðan hann sveik í Icesave-málinu.

[Sæmundur Bjarnason, 6.3.2015 kl. 07:52]

Kannski er það bara gott hjá Bjarna Ben. að losa sig við öfgamennina úr flokknum. Doddson vill hann örugglega losna við. Hægrimenn eiga að vilja fara í ESB. Verkalýðsforkólfar einnig. Sömuleiðis kristinfræðikennarar. Annars er þýðingarlaust að þræta um þetta ESB-mál, meira að segja JónBaldvin er orðinn afhuga inngöngu.

[albafos 6.3.2015 kl. 10:05]

Gódan dag, mjög mikilvaegar upplýsingar -> http://en-albafos.blog.cz

[DoctorE 6.3.2015 kl. 11:27]

Píratar eru málið, löngu tímabært að losna við gömlu jálka-flokkana

[Anna Sigríður Guðmundsdóttir, 7.3.2015 kl. 00:54]

Verst að dómstólavarðir bankarnir/lífeyrissjóðirnir allsráðandi eiga Pírata, eins og alla aðra flokka. Það finnst mér orðið alveg augljóst. Meira að segja er Birgitta tilbúin að verja verðtryggð, glæpsamlega útreiknuð, og ólöglega sýslumanna/bankarukkuð einstaklingsneytendalánin.

Ég kaus Pírata í síðustu sveitarstjórnarkosningum, vegna þess meðal annars, að það var varla hægt að þverfóta fyrir rándýrum auglýsingum annarra forréttindaframboða í mínu sveitarfélagi. Og í fjölmiðlum fengu Píratar lítið sem ekkert að láta ljós sitt skína. Það var ólýðræðisleg og óréttlát kosningabarátta að mínu mati.

Við Íslandsbúar erum víst bara einn og sami Íslandsflokkurinn, og eitt og sama samfélagsþjóðríkið. Þó vilja margir gera allt til að sundra og spilla samstöðumætti Íslandsbúa gegn glæpabönkum/dómsstólum, með stríðsherjandi klíkuflokkastríði.

M.b.kv.

[Jón Valur Jensson, 7.3.2015 kl. 08:17]

Þú tíðkar það nú bersýnilega, Sæmundur, að skrifa án ábyrgðar, það hæfir, þegar menn skrifa í þessum strákslega dúr manns, sem misst hefur staðfestu sína og glatað sínum pólitísku hyggindum, og er engu skárra en þær hjálækningar sem þú ert þó gagnrýninn á.

[Sæmundur Bjarnason, 8.3.2015 kl. 13:27]

Já, DoctorE á margan hátt eru Píratar það afl sem helst er hægt að sætta sig við. Þó eru þeir ekki óskeikulir.

[Sæmundur Bjarnason, 8.3.2015 kl. 13:29]

Anna Sigríður, ég hef ekki andstyggð á verðtryggingunni sem slíkri. Öllu máli skiptir hvernig hún er útfærð og hvort hún er eina tryggingin.

[Sæmundur Bjarnason, 8.3.2015 kl. 13:32]

Já, ég skrifa að mestu án ábyrgðar, Jón Valur. Hver ætti líka að draga mig til ábyrgðar? En þú talar útfrá þínum eigin ímyndunum þegar þú talar um staðfestu og pólitísk hyggindi.

[Jón Valur Jensson, 8.3.2015 kl. 21:00]

Ég lít nú nánast á það sem einhvers konar bilun að ætla að kjósa Pírata, flokk sem mælir t.d. með refsileysi fyrir kókaíninnflutning (sjá HÉR!) -- og rövlar svo yfir því að brotið sé gegn friðhelgi persónuupplýsinga óprúttinna hælisleitenda, sem við vitum allt of lítið hverjir eru (hve gamlir, hvað þeir heita, frá hvaða landi etc.), og samt eru Píratar helzti "flokkurinn" sem styður Wikileaks!

[DoctorE 9.3.2015 kl. 10:34]

Það að JVJ sé á móti pírötum eru bestu meðmælin!

[Sæmundur Bjarnason, 9.3.2015 kl. 13:09]

Af hverju ættu hælisleitendur ekki að njóta friðheldi á sama hátt og aðrir? Getur þú svarað því Jón Valur?