2257 - ISIS

Á fésbókinni er nú mikið talað um hvað RUV-ið sé frábært. Hlusta bara afar sjaldan á það. Útvarpið altsvo, sem virðist einkum álíta að eina listgreinin í heiminum sé rokktónlist. Horfi heldur ekki á sjónvarp (nema þá helst fréttir). Þar virðist álitið að ekkert sé merkilegt nema amerískar gauragangs-seríur og gamlar kvikmyndir. Les aðallega bækur þó slíkt sé að mestu komið úr móð, nema þá einhver krimmavitleysa. Enskan er orðin mitt lestrarmál aðallega vegna þess að verðlag á íslenskum rafbókum er svo fáránlegt. Bókasöfnin blíva, en ég nenni ekki að fara þangað daglega eins og þyrfti ef maður ætlaði sér að fá annað en hundgamlar bækur.

Hlustaði og horfði þrátt fyrir allt á nýja umræðuþáttinn og finnst hann misheppnaður að flestu leyti. Þröstur í fýlu, Styrmir reyndi að stjórna og konurnar töluðu og möluðu. Afleitur þáttur.

Kannski ég láti neikvæðninni lokið hér. Langskemmtlegast er samt að hafa allt á hornum sér og það er ekki erfitt. Samt er fólk ekki fífl. Bara fræga fólkið. Verst í heimi er að vera bara frægur fyrir það að vera frægur. Næstverst er að vera frægur fyrir að vera í einhverri hljómsveit. Aldrei gæti ég það. Enda laglaus með öllu.

Tuttugasta og fyrsta öldin verður áreiðanlega öld internetsins. Sú breyting sem það veldur og hefur valdið er gríðarleg. Tuttugasta öldin verður sennilega talin þegar frá líður öld heimsstyrjaldanna. Fyrir ungt fólk í dag er sennilega erfitt að setja sig inn í hugsunarhátt fólks á fyrri tíð. Þó er það reynt. Sagnfræðingar ná engum árangri ef þeir geta ekki gert sér í hugarlund hvernig lífið hefur verið áður fyrr.

Með internetinu og allri þeirri tæknibyltingu sem orðið hefur og breytingarnar á samskiptum fólks eru svo miklar að undrum sætir. Þó er fólk einmana innan um öll raftækin. Að vera einn með sjálfum sér er ekki síður mikilvægt. Og að þola sjálfan sig er ef til vill mikilvægast af öllu.

Og svo er víst ekki nóg með að ISIS hafi viljað nota sér .is endinguna á internetinu heldur er því haldið fram samkvæmt nýjustu fréttum að íslenskur kvikmyndatökumaður starfi hjá samtökunum. Þetta verður kannski heitasta fréttin í dag, ásamt óveðursfréttum úr Reykjavík.

Steinar og vatn.

Athugasemdir

[Jóhannes 10.12.2014 kl. 19:26]

Ef íslenskur kvikmyndatökugerðarmaður starfar hjá IS þá verður að koma þeim upplýsingum á framfæri við lögregluna. Annað telst lögbrot. Vitir þú eitthvað nánar um þetta mál, eða getir bent á einhvern sem gerir það (og þar með forðað þeim aðila frá fangelsisvist fyrir að leyna upplýsingunum), þá hvet ég þig eindregið til að hafa samband við rannsóknarlögregluna strax. 

https://www.youtube.com/watch?v=HdIEm1s6yhY

https://www.youtube.com/watch?v=vJI5bqkVirI