1548 - Jól, Palestína o.fl.

Gamla myndin.
Þessi mynd hlýtur að vera tekin í Löngubrekku í Kópavogi. Hvað Jón Kristinn og Bjössi eru að ræða um þarna veit ég þó ekki.

Segja má að stefni í hanaslag milli ríkisendurskoðanda Sveins Arasonar og ríkislögreglustjóra Haraldar Johannessen. Allt bendir til að ríkislögreglustjóri tapi þeim slag. Þó getur þetta mál endað fyrir dómi og hugsanlega haft áhrif á ríkisstjórnina. Þetta mál fjallar um að ríkislögreglustjórni afhendi ríkisendurskoðanda gögn um innkaup þess fyrrnefnda á ákveðnu tímabili. Hugsanlega skiptir mestu máli hvernig túlkuð er sú neyð sem lögreglan bjó við, eða taldi sig búa við, þegar ákvörðun um kaupin var tekin.

Þegar ég var lítill var þessi vísa mjög vinsæl:

Þó desember sé dimmur
þá dýrleg á hann Jól.
Með honum endar árið
og aftur hækkar sól.

Ekki veit ég eftir hvern þessi vísa er. Kannski er þetta úr ljóði um alla mánuðina. Líka voru vinsælar vísur um gömlu mánuðina og t.d. rámar mig í vísu um Góu þar sem sagt var að hún gengi á éljapilsi síðu.

Upphaf Gilsbakkaþulu var einnig mjög frægt og jafnvel þulan öll sem ég held að sé svona tíu til tólf vísur. Mig minnir að fyrsta vísan sé svona:

Kátt er á jólunum, koma þau senn,
upp munu þá líta Gilsbakkamenn,
upp munu þeir líta og undra það mest,
að úti sjái þeir stúlku og blesóttan hest,
úti sjái þeir stúlku, sem umtöluð varð:
"Það sé ég hér ríður hún Guðrún mín í garð,
það sé ég hér ríður hún Guðrún mín heim."

Sagt er að þulan sé eftir einhvern Kolbein Þorsteinsson (Google.com) en engin deili veit ég á honum.

Það eru einkum þrjú mál sem núverandi ríkisstjórn þarf að koma í höfn áður en hún gefst upp. Þau eru: ESB, kvótinn og stjórnarskráin. Vaxandi líkur eru á að hún komi alls ekki öllum þessum málum í gegn fyrir næstu kosningar. Jafnvel bara einu þeirra. Mestar líkur eru á að það verði kvótamálið, jafnvel þó LÍÚ, sjálfstæðisflokkurinn og hugsanlega sjávarútvegsráðherrann sjálfur standi mjög ákveðið gegn öllum breytingum þar. Alls ekki er þó líklegt að gjafakvótinn eða leyfið til framsals veiðiheimilda verði með öllu afnumið. Miklu líklegra er að enn verði reynt að lappa upp á kerfið. Þjóðin er samt einhuga um að umbóta sé þörf á kvótakerfinu.

Í dag var samþykkt á alþingi tillaga um viðurkenningu á sjálfstæði Palestínu. Sú tillaga var samþykkt með 38 atkvæðum. Sjálfstæðismenn 13 að tölu sátu þó hjá og er skömm þeirra mikil.

Þetta eiga ökumenn að lesa og tileinka sér á hálfri sekúndu.

Athugasemdir

[Harpa Hreinsdóttir 30.11.2011 kl. 00:32]

Merkilegt nokk hefur frændi minn tekið saman pistil um sr. Kolbein þann er orti Gilsbakkaþulu (sá var prestur á Gilsbakka í Hvítársíðu en fluttist seinna í Miðdal - í Mosfellssveit segir frændi minn en ég held að það sé ekki rétt heldur hafi sr. Kolbeinn orðið prestur í Miðdal í Laugardal). Sjá s. 7 í þessum bæklingi:

http://staff.unak.is/not/oddurv/skjol/baeklingur.pdf

[Harpa Hreinsdóttir 30.11.2011 kl. 00:35]

Og hér er einnig örstutt æviágrip þessa merkilega prests og Gilsbakkaþula fylgir fyrir neðan - síða úr Æskunni 1973:

http://timarit.is/view_page_init.jsp?pageId=4628447

[Harpa Hreinsdóttir 30.11.2011 kl. 00:39]

Vísan um desember er úr mánaðakvæði, líklega þjóðkvæði, sem hefst á "Tólf eru synir tímans".

[Sæmundur Bjarnason, 30.11.2011 kl. 10:40]

Takk Harpa. Vissi þetta ekki.

[Vilhjálmur Örn Vilhjálmsson, 30.11.2011 kl. 14:39]

Og þú veist heldur ekki, að Sjálfstæðisflokkurinn tekur ekki þátt í helför með því að hann stimplaði sig út við atkvæðagreiðsluna um Palestínu. Eins og þetta væri mikilvægasta málið í leiksýningu Samfylkingarinnar? Össur varð reyndar ekki fyrstur til að ljá Pal-ríkinu sem aldrei var til stuðning sinn. Kýpur og Malta voru víst búin að veita þann stuðning þegar árið 1988. Össur er ekki skarpur í þeirri sögu sem hann vill breyta, frekar en aðrir Íslendingar, því það sem rekur ykkur áfram er gyðingahatur, gamalgróin illindi og öfgar.

[Ólafur Sveinsson 30.11.2011 kl. 16:29]

Við, sem fæddur erum á dögum Kristján heitins tíunda og fylgst höfum vel með málum Palestínu, erum bara flest á annari skoðun, en þú Vilhjálmur.

[Sæmundur Bjarnason, 30.11.2011 kl. 22:56]

Já, Villi minn, ég tek ekki mikið mark á þér í Palestínumálum og ekki Fischer-málum heldur. Í mörgu öðru ert þú samt vel að þér en hættir til að ýkja hlutina.

Man vel eftir því þegar David Ben-Gurion kom í heimsókn til Íslands og móðgaði hina sannkristnu sjálfstæðismenn.