1063 - Að loknum landsfundi

Pólitísk umræða á Íslandi er alltof illskeytt. Skil ekki hvernig fólk hefur geð í sér til að bera á borð allan þann óhroða sem það lætur útúr sér í umræðu sem kölluð er pólitísk. Bloggarar eru margir ofurseldir þessu og greinilega nýtur umræða þessi einhverra vinsælda.

Tvær samþykktir nýliðins landsfundar Sjálfstæðismanna vekja eftirtekt. Önnur fjallar um spillingu og er almennt orðuð þannig að auðvelt verður að fara í kringum hana. Framsögumaðurinn nefndi þó tvö nöfn í ræðu sinni og erfitt er að sjá hvernig þeim Guðlaugi Þór Þórðarsyni og Gísla Marteini Baldurssyni verður vært í flokknum að loknu þessu landsþingi.

Hin fjallar um ESB og er um það að Sjálfstæðisflokknum beri að stuðla að því að umsóknin um aðild þar verði dregin til baka. ESB-sinnar í flokknum eru mjög ósáttir við þessa tillögu og telja hana óþarfa. Kannski þjappar hún sjálfstæðismönnum saman en óneitanlega er tekin talsverð áhætta varðandi mögulegan klofning.

Klofningstal sjálfstæðismanna hefur aukist undanfarið. Bendi bara á blogg Guðbjörns Guðbjörnssonar á eyjunnni.is og Friðriks Hansen Guðmundssonar hér á Moggablogginu. Samstarf Sjálfstæðisflokksins við aðra flokka gæti versnað verulega í kjölfar landsfundarsamþykktarinnar.

Auðvitað neitar Bjarni Benediksson því harðlega að klofningur sé í flokknum. Man vel eftir Geir Hallgrímssyni rauðnefjuðum og ræfilslegum harðneita öllum klofningi þó Gunnar Thoroddsen væri búinn að mynda ríkisstjórn með öðrum.

Í Vinstri græna flokknum er andstaðan við ESB-umsóknina vaxandi og einnig við ýmis önnur mál sem ríkisstjórnin ber fyrir brjósti. Vel getur verið að óánægjuöflin þar nái að lokum meirihluta. Sú staða yrði núverandi forystu flokksins hættuleg en andúðin á stjórnarandstöðunni er sterkari en svo að líklegt sé að flokkurinn sé á leið úr ríkisstjórninni.

Viðbrögðin við dómi hæstaréttar um gengistryggð lán valda nokkurri furðu. Það sem ráðherrar ríkisstjórnarinar segja og gera er þó ekkert einkennilegt. Þar vilja menn umfram allt fresta málum endalaust og sjá til hvort Eyjólfur fari ekki að hressast. Lánastofnanir reyna líka að verja sig og sína peninga eftir mætti. Þeir sem telja sig hafa orðið fyrir barðinu á lánastofnunum virðast hinsvegar ekki ætla að skipuleggja sig á neinn hátt og sækja það sem ekki er annað að sjá en þeir eigi með réttu.

Og nokkrar myndir:

Sóleyjar í túni.

Þetta er erfið þjónusta.

Í Fossvoginum.

Sjöunda innsiglið.

Innrásin mikla.

Steinn frá Mars?

Athugasemdir

[Axel Þór Kolbeinsson, 28.6.2010 kl. 09:02]

Góðan daginn Sæmundur.

Mikið er ég sammála þér varðandi illskeytta umræðu í pólitík, án þess að fara nánar út í það.

Varðandi meira afgerandi stefnu Sjálfstæðisflokksins gegn Evrópusambandsaðild tel ég að það sé gott og eðlilegt fyrir stjórnmálaflokk að hafa afgerandi stefnu með eða á móti í svona stóru máli.  Hvort breytingin á stefnunni leiði til klofnings efast ég um, en ljóst er að félagsmönnum mun fækka eitthvað.

[Sæmundur Bjarnason, 28.6.2010 kl. 09:38]

Já, Axel Þór. Best er sennilega fyrir stjórnmálaflokk að taka afstöðu til sem fæstra mála. Með afstöðu fælirðu alltaf einhverja í burtu. Kannski speglast afstaða kjósenda með tímanum í stefnu flokka með þessum hætti.

[Sigurður Þór Guðjónsson, 28.6.2010 kl. 17:35]

Ætli Guðlaugur og Gísli þeir sitji bara ekki áfram eins og ekkert sé og svo verður ekki um þetta rætt meira í flokknum.

[Sæmundur Bjarnason, 29.6.2010 kl. 00:19]

Já og svo þreytast andstæðingarnir líka á því að tala um þetta. Eru ekki allir búnir að fá leið á að tala um Árna Johnsen?